ترجمان الیکشن کمیشن آزاد جموں و کشمیر کا کہنا ہے کہ آزاد کشمیر میں عام انتخابات 27 جولائی کو شیڈول کے مطابق ہی منعقد ہوں گے۔
ترجمان کے مطابق اسمبلی کی آئینی مدت اور قانونی تقاضوں کے تحت 5 جون کو انتخابی شیڈول جاری کیا گیا تھا، اور انتخابات کے التوا سے متعلق تمام قیاس آرائیاں بے بنیاد ہیں۔
انہوں نے کہا کہ انتخابی شیڈول مکمل طور پر آئینی و قانونی تقاضوں کے مطابق جاری کیا گیا ہے، اور اسے کسی بھی سیاسی مقصد کے تحت منسوب کرنا درست نہیں۔ ترجمان کے مطابق الیکشن بروقت کرانا ادارے کی آئینی ذمہ داری ہے۔
الیکشن کمیشن نے واضح کیا کہ آزاد کشمیر میں شفاف، آزادانہ اور غیر جانبدار انتخابات کا انعقاد ہر صورت یقینی بنایا جائے گا۔
