اسلام آباد(ویب رپورٹر) وزیر دفاع خواجہ آصف کا کہنا ہے کہ رانا ثنا اللہ کے وارنٹ گرفتاری جاری کر دیئے، ہمیں پنجاب حکومت کا کوئی خوف نہیں۔گرفتار کرنا ہے کر لیں، میرے خلاف کیس کی گفتگو بھی سامنے آگئی۔آہستہ آہستہ انہیں منہ چھپانے کی ضرورت پڑے گی، یہ عوام کے ساتھ جھوٹ بولتے ہیں۔کے پی میں نیب بند کر دیا گیا، کے پی میں نیب کی کوئی حیثیت نہیں تھی، پاکستان کے کرپٹ ترین لوگ عمران خان کے ساتھ ہیں،سیلاب متاثرین کے لیے اس نے ایک لفظ نہیں کہا، تیس چالیس جلسے ضرور کیے،انہوں نے اسلام آباد میں پریس کانفرنس کرتے ہوئے مزید کہا کہ قوم کی خوش قسمتی ہے کہ عمران خان کے چہرے سے نقاب اتر گیا۔
کل دو آڈیو لیکس سامنے آئی وہ گفتگو سب نے سنی ہے۔عمران خان بتائیں اس کا کون سا بیانیہ پورا ہوا۔
اب اس نے بیانیہ تبدیل کرکے الیکشن میں ووٹرز خریدنے کا بنایا۔بیرونی سازشوں والی آڈیو بھی آ گئی ہے۔ایک شخص نعرہ بناتا ہے جیب سے کاغذ نکال کر لہراتا ہے۔جب اس سے خط کا پوچھا گیا تو کہتا گم ہو گیا۔کہتا تھا وہ بیچنا شرک ہے اور خود کہتا ہے کہ پانچ بندے میں نے خرید لیے۔
خواجہ آصف نے مزید کہا کہ ہمیں پنجاب حکومت سے کوئی خوف نہیں گرفتار کر لیں۔ہم ان کی طرح عدالتوں میں ضمانتوں کے لیے دھکے نہیں کھائیں گے۔خیال رہے کہ اسیشل جوڈیشل مجسٹریٹ غلام اکبر کی جانب سے وفاقی وزیر داخلہ کے وارنٹ جاری کر دئیے گئے ہیں۔ رانا ثناء اللہ کے وارنٹ گرفتاری اینٹی کرپشن انکوائری میں حاضر نہ ہونے پر جاری ہوئے۔ ترجمان اینٹی کرپشن پنجاب کے مطابق رانا ثناء اللہ کے نا قابل ضمانت وارنٹ گرفتاری اسپیشل جوڈیشل مجسٹریٹ نے جاری کئے،رانا ثناء اللہ کے وارنٹ گرفتاری اینٹی کرپشن انکوائری میں حاضر نہ ہونے پر جاری کئے گئے،وفاقی وزیر داخلہ کے وارنٹ مقدمہ نمبر 19/20 میں جاری ہوئے۔
ادھر وزیر داخلہ کی گرفتاری کیلئے ٹیم تشکیل دے دی گئی،ضابطے کے مطابق مقامی پولیس کو اطلاع دے کر رانا ثناء اللہ کی گرفتاری کے عمل کا آغاز کیا جائے گا جبکہ رانا ثناء اللہ کی گرفتاری کیلئے پنجاب پولیس کی ٹیم روانہ ہو گئی ہے۔
