مسجد الحرام میں جاری ڈیجیٹل اقدامات کے باعث دنیا بھر کے مسلمانوں کا مقدس ترین مقام ایک اہم سنگ میل حاصل کرنے کے قریب ہے۔
العربیہ نے ایس پی اے کے حوالے سے رپورٹ کیا ہے کہ مسجد الحرام میں جاری ڈیجیٹل اقدامات روزمرہ امور کو تیز اور کارکردگی کو بہتر بنا رہے ہیں۔ ان اقدامات کی بدولت یہ مقام 2030 تک دنیا کے بہترین مقامات میں شامل ہونے کی طرف گامزن ہے۔
مسجد الحرام اور مسجد نبوی ﷺ کے امور کی جنرل اتھارٹی کے نائب سربراہ برائے ڈیجیٹل ٹرانسفارمیشن ڈاکٹر محمد الصقر نے بتایا کہ اتھارٹی کے اسمارٹ موبلٹی پلیٹ فارم نے ٹرانزٹ خدمات اور مربوط الیکٹرانک بکنگ و ادائیگی کو خودکار کر دیا ہے۔
انہوں نے کہا کہ ان اقدامات سے حالیہ حج کے دوران حجاج اور زائرین کے انتظار کا وقت گھٹ کر صرف 9 منٹ رہ گیا ہے، جبکہ تین سال قبل یہ تقریباً 2 گھنٹے تھا۔
ڈیجیٹل تبدیلی نے مسجد الحرام کے افطار کے امور کو بھی جدید بنا دیا ہے۔ اس کے تحت تقریباً 500 ملین ریال کے لین دین کے ساتھ 38 ملین سے زیادہ کھانے تقسیم کیے گئے۔
قومی احسان چیریٹی پلیٹ فارم سے انضمام اور فریق ثالث کی نگرانی کے ذریعے انتظامی کلیئرنس کا وقت 8 دن سے کم ہو کر اب صرف 8 منٹ رہ گیا ہے۔
ڈاکٹر الصقر کے مطابق اتھارٹی حرمین الشریفین میں اسمارٹ ٹیکنالوجی کو مزید وسعت دے رہی ہے۔ اس سلسلے میں "رافد” پلیٹ فارم 18 حکومتی اداروں کو مربوط کرتا ہے جبکہ انٹرایکٹو ڈیجیٹل میپنگ سسٹم سالانہ تقریباً 600,000 کیسز دیکھتا ہے جو 60 لاکھ سالانہ زائرین میں سے تقریباً 10 فیصد کو خدمات فراہم کرتا ہے۔
