برطانیہ نے بڑے پیمانے پر جنگ کی تیاری شروع کر دی ہے۔ مسلح افواج کے وزیر کرنل ایسکاٹ کارنز نے کہا ہے کہ جنگ کے سائے یورپ کے دروازے پر دستک دے رہے ہیں اور برطانیہ کو ہر صورت تیار ہونا ہوگا۔
ایک انٹرویو میں برطانوی وزیر کا کہنا تھا کہ گزشتہ ایک سال کے دوران برطانیہ کے خلاف دشمن انٹیلیجنس سرگرمیوں میں 50 فیصد سے زیادہ اضافہ ہوا ہے۔ انہوں نے زور دیا کہ نیٹو ممالک کو جنگی تیاریوں کے لیے اپنے دفاعی اخراجات میں اضافہ کرنا ہوگا۔
امریکی اسپیشل فورسز کا چین سے ایران جانے والے جہاز پر چھاپہ، دفاعی سامان ضبط
کرنل ایسکاٹ کارنز نے بتایا کہ گزشتہ پچاس سے ساٹھ سالوں سے برطانیہ نے اپنا دفاع امریکا کو آؤٹ سورس کر رکھا تھا، تاہم اب برطانیہ کو اپنے دفاع کے لیے امریکا پر انحصار ختم کرنا ہوگا، یہ رویہ ترک کرنا ہوگا اور اپنے دفاع کی ذمہ داری خود اٹھانا ہوگی۔
خبر ایجنسی کے مطابق برطانوی حکومت نے نئی ڈیفنس کاؤنٹر انٹیلیجنس یونٹ قائم کرنے کا اعلان کیا ہے جو مخالف ریاستوں کی جاسوسی کارروائیوں کا سراغ لگانے اور انہیں ناکام بنانے کی صلاحیت میں اضافہ کرے گی۔
یہ بیان ایسے وقت میں سامنے آیا ہے جب نیٹو کے سربراہ مارک روٹے نے یورپی اتحادیوں کو خبردار کیا ہے کہ انہیں روس کے ساتھ ممکنہ بڑے تصادم کے لیے تیار رہنا چاہیے، ایسا تصادم جس کی شدت ماضی میں پہلی اور دوسری عالمی جنگوں کے دوران دیکھی گئی تھی۔
