لاہور : سربراہ عوامی مسلم لیگ وسابق وفاقی وزیر داخلہ شیخ رشید احمد نے کہا ہے کہ سارا ملک 9 مئی واقعہ پر لعنت بھیجتا اور شرمناک قرار دیتا ہے، خدا کے لئے بے گناہوں کو رہا اور گناہ گاروں کو سزا دی جائے۔
سماجی رابطے کی ویب سائٹ ٹوئٹر پر اپنے ویڈیو پیغام میں شیخ رشید احمد کا کہنا تھا کہ ایک بار پھر رات کو پنجاب پولیس اور ایلیٹ فورس نے 40گالف سٹی میرے گھر پر چھاپہ مارا، پولیس میرے گھر دوبارہ دروازے توڑ کر داخل ہوئی، اچھی بات یہ ہے کہ کسی ملازم کو نہیں مارا توڑ پھوڑ نہیں کی۔
اگر یہ سمجھتے ہیں کہ ویڈیوز اور کیمرے لے گئے ہیں، گھبرائیں نہیں میرے پاس سارا ریکارڈ موجود ہے۔ تحقیقات کی جائیں کہ نامعلوموں اور نامزد لوگوں کو نکالنے کے لئے کیا وصولیاں اور کتنا پیسہ لیا جا رہا ہے۔سابق وفاقی وزیر کا کہنا تھا کہ لوٹ مار کی جا رہی ہے لوگ آگے ہی بہت تنگ ہیں، یہ فوج ہماری ہے، یہ پاکستان کی فوج ہے، ایک ماہ ہوگیا ہے لوگوں کے گھروں میں صف ماتم بچھی ہوئی ہے۔
پاکستان میں غربت ، مہنگائی اور بیروزگاری ہے، ان پی ڈی ایم کے لوگوں کو کسی نے ووٹ نہیں دینے، جو قاسم کے ابو کو چھوڑ گیا ہے وہ گنگا نہایا ہے، بے گناہ جیل میں پڑے ہیں یہ کوئی انصاف نہیں ہے، مہربانی کر کے گناہ گاروں کو سزا اور بے گناہوں کو رہا کیا جائے۔دریں اثنا شیخ رشید احمد نے تحریک انصاف چھوڑنے والے سابق وزیر اعلیٰ پنجاب عثمان بزدار کو بزدلوں کا امام قرار دے دیا۔ اپنے بیان میں عوامی مسلم لیگ کے سربراہ نے کہا کہ قاسم کے ابو نے بزدار کیلئے ہمیشہ سٹینڈ لیا مگر وہ صرف بس سٹینڈ نکلا۔ منحرف ارکان کے سیاسی جوڑ توڑ سے کوئی فرق نہیں پڑے گا۔
