بنگلادیش میں جاری ساؤتھ ایشین کراٹے چیمپئن شپ کے پہلے روز پاکستان نے شاندار کارکردگی کا مظاہرہ کرتے ہوئے 2 گولڈ، 1 سلور اور 7 برانز میڈلز سمیت مجموعی طور پر 10 تمغے جیت لیے۔
میر پور میں ہونے والی چیمپئن شپ میں پاکستان کے میر حمزہ کاسی نے مائنس 75 کلوگرام کیٹیگری میں گولڈ میڈل حاصل کیا، جبکہ طہٰ مصطفیٰ نے مائنس 63 کلوگرام جونیئر کیٹیگری میں کامیابی حاصل کرکے پاکستان کو دوسرا گولڈ میڈل دلایا۔
ویمنز کراٹے ایونٹ میں پاکستان کی پانچ کھلاڑیوں نے کانسی کے تمغے جیتے۔ ان میں انیتا فاطمہ، حافظہ اقرا منور، اقصا اعظم، لائبہ ضیا اور رابعہ فاروق شامل ہیں۔
مینز ایونٹ میں میر واعظ خان نے سلور میڈل حاصل کیا، جبکہ شمش افتخار اور میر حمزہ نے کانسی کے تمغے اپنے نام کیے۔
پاکستانی ٹیم کی ابتدائی روز کی کارکردگی کو چیمپئن شپ میں ایک مثبت آغاز قرار دیا جا رہا ہے۔
