اساس انٹرنیشنل اسکول، ایف-8 کیمپس کے شعبۂ شمولیتی تعلیم کے زیرِ اہتمام خصوصی صلاحیتوں اور نشوونما کی مختلف ضروریات کے حامل بچوں کے والدین کی ذہنی و جذباتی صحت اور فلاح و بہبود کے حوالے سے ایک خصوصی نشست بعنوان ’’آپ اہم ہیں‘‘ منعقد کی گئی۔ اس نشست کا بنیادی مقصد والدین کو اپنی ذہنی صحت، جذباتی سکون اور ذاتی نگہداشت کی اہمیت سے آگاہ کرنا اور روزمرہ زندگی میں پیش آنے والے چیلنجز سے بہتر انداز میں نمٹنے کے لیے رہنمائی فراہم کرنا تھا۔
تقریب میں ڈاکٹر محمد عمر فیاض اور ڈاکٹر شگفتہ جبین نے بطور مہمان مقرر شرکت کی۔ انہوں نے والدین کو درپیش ذہنی دباؤ، جذباتی مشکلات اور روزمرہ ذمہ داریوں کے نتیجے میں پیدا ہونے والے چیلنجز پر تفصیلی روشنی ڈالی۔ مقررین نے اس بات پر زور دیا کہ بچوں کی بہتر نگہداشت، تربیت اور نشوونما کے لیے والدین کی اپنی ذہنی و جذباتی صحت کا خیال رکھنا بھی نہایت ضروری ہے۔ اس موقع پر ذہنی سکون حاصل کرنے، تناؤ میں کمی لانے اور جذباتی توازن برقرار رکھنے کے لیے عملی مشقیں، ذہن آگاهی کی سرگرمیاں اور مفید طریقے بھی متعارف کروائے گئے۔
بلی جین کنگ کپ: ایران نے فائنل میں پاکستان کو شکست دے کر ٹائٹل جیت لیا، پاکستان رنرز اپ رہا
نشست کے دوران دلچسپ سرگرمیوں اور بامقصد گفتگو کے ذریعے والدین کو اپنی ضروریات کو سمجھنے، اپنی ذات کے لیے وقت نکالنے اور مثبت طرزِ فکر اپنانے کی ترغیب دی گئی۔ اس بات کو بھی اجاگر کیا گیا کہ خصوصی ضروریات کے حامل بچوں کی پرورش اور نگہداشت کے دوران والدین کو مختلف جذباتی اور عملی مشکلات کا سامنا کرنا پڑ سکتا ہے، اس لیے انہیں ہمدردی، حوصلہ افزائی اور مناسب معاونت فراہم کرنا انتہائی اہمیت رکھتا ہے۔
اساس انٹرنیشنل اسکول کا شعبۂ شمولیتی تعلیم ہر بچے کی انفرادی صلاحیتوں اور ضروریات کو تسلیم کرتے ہوئے ایک سازگار، محفوظ اور معاون تعلیمی ماحول فراہم کرنے کے لیے پُرعزم ہے۔ اسی مقصد کے تحت والدین کی شمولیت، خاندانی معاونت اور بچوں کی ہمہ جہت نشوونما کو خصوصی اہمیت دی جاتی ہے۔ ’’آپ اہم ہیں‘‘ جیسی سرگرمیاں والدین اور تعلیمی ادارے کے درمیان تعاون کو مزید مضبوط بنانے اور خاندانوں کی فلاح و بہبود کو فروغ دینے کی جانب ایک اہم قدم ہیں۔
تقریب کا مرکزی پیغام یہ تھا کہ والدین بھی توجہ، محبت، احترام اور جذباتی معاونت کے مستحق ہیں۔ جب والدین کی ضروریات کو سمجھا جائے اور انہیں مناسب تعاون فراہم کیا جائے تو وہ اپنے بچوں کی بہتر نگہداشت، تربیت اور نشوونما میں زیادہ مؤثر کردار ادا کر سکتے ہیں۔
اساس انٹرنیشنل اسکول معیاری تعلیم، جامع تربیت اور شمولیتی تعلیمی ماحول کی فراہمی کے لیے اپنی کوششیں جاری رکھے ہوئے ہے۔ ادارہ اس یقین کے ساتھ کام کر رہا ہے کہ ہر بچے کی صلاحیتوں کو نکھارنے اور اسے ترقی کے مساوی مواقع فراہم کرنے کے لیے والدین، اساتذہ اور متعلقہ ماہرین کے درمیان باہمی تعاون ناگزیر ہے۔
