**لاہور: یو ایچ ایس میں پنجاب کے سرکاری شعبے کی جدید ترین کلینیکل لیبارٹری کا افتتاح**
لاہور میں یونیورسٹی آف ہیلتھ سائنسز (یو ایچ ایس) نے پنجاب کے سرکاری شعبے کی جدید ترین کلینیکل لیبارٹری کا باقاعدہ افتتاح کر دیا۔ افتتاحی تقریب کے مہمانِ خصوصی وزیرِ سپیشلائزڈ ہیلتھ خواجہ سلمان رفیق تھے، جبکہ وائس چانسلر پروفیسر احسن وحید راٹھور، پروفیسر ڈاکٹر زاہد پرویز، پروفیسر ڈاکٹر فرید الزکریا، ڈاکٹر عائشہ شوکت اور دیگر معزز شخصیات بھی اس موقع پر موجود تھیں۔
تقریب سے خطاب کرتے ہوئے خواجہ سلمان رفیق نے بتایا کہ نئی کلینیکل لیبارٹری میں 178 سے زائد جدید تشخیصی ٹیسٹ مناسب فیس پر دستیاب ہوں گے، جن میں کینسر، جینیاتی امراض اور دیگر خصوصی نوعیت کے ٹیسٹ شامل ہیں۔ ان کے مطابق اس منصوبے سے عوام اور ہسپتالوں کو ایک ہی جگہ عالمی معیار کی تشخیصی سہولیات میسر آئیں گی۔
انہوں نے کہا کہ یہ لیبارٹری نہ صرف مریضوں کی بروقت اور معیاری تشخیص میں اہم کردار ادا کرے گی بلکہ طبی تحقیق کے فروغ میں بھی معاون ثابت ہوگی۔ پوسٹ گریجویٹ طلبہ کو تحقیقی مقاصد کے لیے کلینیکل نمونے بھی یونیورسٹی کے اندر ہی دستیاب ہوں گے، جبکہ چھ جدید شعبہ جاتی لیبارٹریوں کی مدد سے تشخیصی خدمات کا باقاعدہ آغاز کر دیا گیا ہے۔
وزیرِ سپیشلائزڈ ہیلتھ نے مزید بتایا کہ لاہور سمیت پنجاب کے مختلف شہروں میں نئے ہسپتالوں کا افتتاح بھی جلد کیا جائے گا۔
اس موقع پر وائس چانسلر پروفیسر احسن وحید راٹھور نے کہا کہ یو ایچ ایس نے تعلیم، تحقیق اور مریضوں کی خدمات کو ایک ہی پلیٹ فارم پر یکجا کر دیا ہے۔ ان کے مطابق نئی کلینیکل لیبارٹری عوام کو معیاری، جدید اور کم لاگت تشخیصی سہولیات فراہم کرنے کی جانب ایک اہم پیش رفت ہے۔
