چیف الیکشن کمشنر گلگت بلتستان راجہ شہباز خان نے عام انتخابات 2026 کے تناظر میں انتخابی مہم کو منظم اور ماحول دوست بنانے کے لیے ایک اہم سرکلر جاری کیا ہے، جس کے تحت عوامی و سرکاری املاک پر وال چاکنگ اور نقش نگاری پر مکمل پابندی عائد کر دی گئی ہے۔ الیکشن کمیشن نے مختلف اضلاع میں سیاسی جماعتوں اور امیدواروں کی جانب سے گرافٹی اور وال چاکنگ کے بڑھتے ہوئے رجحان پر شدید تشویش کا اظہار کیا ہے، کیونکہ اس عمل سے نہ صرف بنیادی ڈھانچے اور املاک کی خوبصورتی متاثر ہو رہی ہے بلکہ خطے کے قدرتی حسن اور ماحولیاتی توازن کو بھی نقصان پہنچ رہا ہے۔ عوامی سطح پر موصول ہونے والی شکایات اور بصری آلودگی کے پیش نظر کمیشن نے واضح کیا ہے کہ انتخابی سرگرمیوں کے دوران نظم و ضبط برقرار رکھنا اس کی آئینی ذمہ داری ہے۔
گوادر بندرگاہ پر مئی کا پہلا ٹرانس شپمنٹ کارگو جہاز لنگر انداز
انتخابات ایکٹ 2017 اور ضابطہ اخلاق کی روشنی میں جاری کردہ ان احکامات کے مطابق کسی بھی سیاسی جماعت، امیدوار یا ان کے حامیوں کو سڑکوں، پلوں، سرکاری عمارتوں اور دیگر عوامی تنصیبات پر تحریریں لکھنے کی اجازت نہیں ہوگی۔ الیکشن کمیشن نے تمام اسٹیک ہولڈرز کو ہدایت کی ہے کہ وہ اپنی انتخابی مہم کے لیے صرف قانونی اور ماحول دوست ذرائع ہی اختیار کریں تاکہ خطے کا ماحول متاثر نہ ہو۔ اس سلسلے میں ضلعی مانیٹرنگ افسران، انتظامیہ اور مانیٹرنگ ٹیموں کو خصوصی ہدایات جاری کی گئی ہیں کہ وہ ان احکامات پر سختی سے عملدرآمد کو یقینی بنائیں اور خلاف ورزی کرنے والوں کے خلاف فوری کارروائی کریں۔
سرکلر میں دوٹوک الفاظ میں خبردار کیا گیا ہے کہ وال چاکنگ کی پابندی کی خلاف ورزی کرنے والوں کے خلاف انتخابات ایکٹ کی متعلقہ دفعات کے تحت سخت قانونی چارہ جوئی کی جائے گی۔ اس کارروائی میں بدعنوان طرز عمل اور الیکشن کمیشن کی توہین جیسے الزامات کے تحت سزائیں بھی شامل ہو سکتی ہیں۔ الیکشن کمیشن کا یہ اقدام گلگت بلتستان کے قدرتی حسن کے تحفظ اور انتخابی عمل کو شفاف و مہذب بنانے کی کوششوں کا حصہ ہے، جس کا مقصد سیاسی مہم جوئی کو ایک مقررہ قانونی فریم ورک کے اندر رکھنا ہے۔
