مسئلہ کشمیر جنوبی ایشیا کے امن و استحکام سے جڑا ہوا ایک اہم بین الاقوامی مسئلہ ، ڈپٹی اسپیکر آزاد کشمیر

آزادجموں و کشمیر قانون ساز اسمبلی کے ڈپٹی اسپیکر حافظ احمد رضا قادری ایڈووکیٹ نے کہا ہے کہ 27 اکتوبر 1947 کشمیری عوام کی تاریخ کا المناک دن ہے، جب بھارتی افواج ریاست جموں و کشمیر میں داخل ہوئیں۔ ان کے مطابق اس دن سے کشمیری عوام اپنے بنیادی حقوق، آزادی اور حقِ خودارادیت کے حصول کے لیے جدوجہد کر رہے ہیں۔

حافظ احمد رضا قادری نے کہا کہ کشمیری عوام نے اپنے حقِ خودارادیت کے لیے بے شمار قربانیاں دی ہیں اور عالمی برادری کو مقبوضہ جموں و کشمیر میں انسانی حقوق کے تحفظ کے لیے مؤثر کردار ادا کرنا چاہیے۔ انہوں نے زور دیا کہ مسئلہ کشمیر کا منصفانہ اور پُرامن حل اقوام متحدہ کی متعلقہ قراردادوں اور کشمیری عوام کی امنگوں کے مطابق تلاش کیا جائے۔

ڈپٹی اسپیکر نے کہا کہ مسئلہ کشمیر جنوبی ایشیا کے امن و استحکام سے جڑا اہم بین الاقوامی معاملہ ہے۔ پاکستان اور آزاد کشمیر کے عوام کشمیریوں کی جدوجہد میں ان کے ساتھ کھڑے ہیں اور پاکستان عالمی فورمز پر حقِ خودارادیت کے معاملے کو اجاگر کرتا رہا ہے۔

انہوں نے کہا کہ 27 اکتوبر کو یومِ سیاہ منانے کا مقصد عالمی برادری کو کشمیری عوام کی مشکلات اور قربانیوں کی یاد دہانی کرانا ہے۔ حافظ احمد رضا قادری نے اس عزم کا اظہار کیا کہ مسئلہ کشمیر کے منصفانہ حل تک کشمیری عوام کے حقِ خودارادیت کی حمایت جاری رکھی جائے گی۔