وزیراعلیٰ پنجاب مریم نواز نے کہا ہے کہ وطن عزیز کی ترقی میں اوورسیز پاکستانیوں کا کردار ناقابلِ فراموش ہے اور حکومت ان کے مسائل کے حل کے لیے سنجیدہ اقدامات کر رہی ہے۔
یہ بات انہوں نے رکن قومی اسمبلی نصیر احمد عباس سے ملاقات کے دوران کہی۔ ملاقات میں باہمی دلچسپی کے امور، ترقیاتی منصوبوں کی پیشرفت اور اوورسیز پاکستانیوں کو درپیش مسائل پر تفصیلی تبادلہ خیال کیا گیا۔ اس موقع پر مسلم لیگ (ن) جاپان کے صدر ملک نور اعوان بھی موجود تھے۔
وزیراعلیٰ نے کہا کہ مسلم لیگ (ن) عوامی خدمت کی سیاست پر یقین رکھتی ہے، اور ہر علاقے کی ترقی و عوامی فلاح کے لیے تمام وسائل بروئے کار لائے جا رہے ہیں۔ انہوں نے مزید بتایا کہ "مثالی گاؤں پراجیکٹ” کے تحت دیہات میں معیاری سہولیات فراہم کی جا رہی ہیں، جبکہ پنجاب بھر میں 12 ہزار کلومیٹر طویل سڑکوں کی تعمیر و مرمت مکمل ہو چکی ہے۔
مریم نواز نے فیلڈ اسپتالوں اور "کلینک آن وہیلز” منصوبے کا بھی ذکر کیا، جس کے ذریعے اب تک ایک کروڑ سے زائد مریض مستفید ہو چکے ہیں۔ انہوں نے یقین دہانی کرائی کہ اوورسیز پاکستانیوں کے مسائل ترجیحی بنیادوں پر حل کیے جائیں گے۔
