پاکستان اور عالمی بینک نے آئندہ تعاون کے پروگراموں کو مزید موثر اور ہدف بند بنانے کے لیے تکنیکی رابطے جاری رکھنے پر اتفاق کیا ہے۔ وفاقی وزیر خزانہ محمد اورنگزیب اور عالمی بینک کی کنٹری ڈائریکٹر بولورما امگابازر کی قیادت میں ہونے والی ملاقات میں یہ فیصلہ کیا گیا۔
انڈر 19 ورلڈ کپ، پاکستانی مہم کا آغاز آج انگلینڈ کیخلاف میچ سے ہو گا
دونوں فریقوں نے تسلیم کیا کہ پاکستان نے مالیاتی اور زر مبادلہ کی پالیسیوں کے ذریعے معاشی استحکام کی طرف پیشرفت کی ہے۔ انہوں نے اس بات پر زور دیا کہ اس استحکام کو پائیدار معاشی ترقی، زیادہ سرمایہ کاری اور روزگار کے مواقع پیدا کرنے میں تبدیل کرنا ضروری ہے۔
عالمی بینک نے نجی سرمایہ کاری میں اضافے کی اہمیت کو اجاگر کرتے ہوئے نشاندہی کی کہ موجودہ سرمایہ کاری کی سطحیں کنٹری پارٹنرشپ فریم ورک کے مقررہ اہداف سے کم ہیں۔
وزیر خزانہ نے بتایا کہ ملک میں ڈھانچہ جاتی اصلاحات پہلے ہی جاری ہیں، جن میں ٹیرف کی مناسب تنظیم نو، سرکاری اداروں کے انتظام میں بہتری، ضابطہ کاری کے نظام کی جدید کاری اور شفافیت بڑھانے کے اقدامات شامل ہیں۔ دونوں طرف سے مستقبل کے پروگراموں کو اقتصادی اصلاحات کے ایجنڈے اور قومی ترجیحات کے ساتھ ہم آہنگ کرنے پر زور دیا گیا۔
