اسلام آباد: قومی انسدادِ پولیو مہم اپنے آخری روز بھی بھرپور انداز میں جاری ہے، جس کے ابتدائی چھ روز میں ملک بھر میں 4 کروڑ 37 لاکھ سے زائد بچوں کو پولیو سے بچاؤ کے قطرے پلائے جا چکے ہیں۔
نیشنل ای او سی کے مطابق پنجاب میں 2 کروڑ 30 لاکھ، سندھ میں 1 کروڑ 4 لاکھ، خیبر پختونخوا میں 61 لاکھ 67 ہزار، اور بلوچستان میں 25 لاکھ 84 ہزار سے زائد بچوں کو پولیو کے قطرے پلائے گئے۔
ہانیہ عامر کواقوام متحدہ نے پاکستان کے لیے خواتین کی خیرسگالی کی سفیر مقرر کردیا
ادارے کے مطابق اسلام آباد میں 4 لاکھ 66 ہزار اور گلگت بلتستان میں تقریباً 2 لاکھ 94 ہزار بچوں کو پولیو سے بچاؤ کے قطرے دیے گئے، جبکہ آزاد جموں و کشمیر میں یہ تعداد 7 لاکھ 33 ہزار سے زائد رہی۔
نیشنل ای او سی کا کہنا ہے کہ قوم کے مستقبل کو پولیو سے محفوظ بنانا ہم سب کی قومی ذمہ داری ہے۔ پاکستان سے پولیو کے مکمل خاتمے کے لیے والدین اور سرپرستوں کا کردار انتہائی اہم ہے۔
ادارے نے والدین سے اپیل کی ہے کہ وہ پولیو ٹیموں کا خیرمقدم کریں اور اپنے پانچ سال سے کم عمر بچوں کو پولیو کے قطرے لازمی پلوائیں۔
مزید کہا گیا ہے کہ جنوبی خیبر پختونخوا میں انسدادِ پولیو مہم 20 اکتوبر سے شروع کی جائے گی۔
پولیو ٹیموں سے رابطے یا معلومات کے لیے شہری 1166 پر کال یا 0346-7776546 پر واٹس ایپ پیغام بھیج سکتے ہیں۔
