راولپنڈی میں ایک ٹک ٹاکر نے وڈیو بنانے کے شوق میں اپنی جان کے ساتھ ساتھ شہریوں کی زندگی کو بھی خطرے میں ڈال دیا۔
مری روڈ پر یہ واقعہ اس وقت پیش آیا جب ٹک ٹاکر چلتی جیپ سے اترکرساتھ چلتے ہوئے ویڈیو بنا رہا تھا ڈرائیور نے اس کا ساتھ دیتے ہوئے ویڈیو بنائی اوراسے ٹک ٹاک پر وائرل کر دیا۔
ویڈیو میں دیکھا جا سکتا ہے کہ ٹک ٹاکر نے کمیٹی چوک کے قریب انتہائی خطرناک اندازاختیار کیا، جس سے عام شہریوں کی سلامتی کو خطرہ لاحق ہوا، واقعہ سامنے آنے پر سی ٹی او راولپنڈی فرحان اسلم نے فوری نوٹس لیا۔
ان کی ہدایت پر ڈی ایس پی مری روڈ سرکل راجہ خرم نے ملزم کو گرفتار کر کے اس کے زیر استعمال جیپ بھی تحویل میں لے لی۔
سی ٹی او فرحان اسلم نے کہا کہ گرفتار ملزم کے خلاف غیر ذمہ دارانہ رویے اور ٹریفک قوانین کی خلاف ورزی پر مقدمہ درج کیا جائیگا اس واقعے نے شہریوں میں ٹک ٹاک اور سوشل میڈیا کے غلط استعمال پر تشویش پیدا کردی ہے۔
پولیس کی جانب سے شہریوں کو خبردار کیا گیا ہے کہ ایسے غیر محفوظ اورخطرناک انداز میں وڈیو بنانا قانونی طور پر ممنوع ہے اور عوامی سلامتی کے لیے سنگین نتائج لا سکتا ہے۔
