پاکستان سمیت دنیا بھر میں مسیحی برادری آج کرسمس منا رہی ہے، وزیراعظم کی مبارکباد

پاکستان سمیت دنیا بھر میں مسیحی برادری آج کرسمس کا تہوار مذہبی جوش و جذبے کے ساتھ منا رہی ہے۔

کرسمس کی شام کے آغاز کے ساتھ ہی دنیا بھر کے گرجا گھروں میں خصوصی عبادات کا سلسلہ شروع ہو گیا۔ کراچی، لاہور، پشاور، کوئٹہ سمیت ملک کے مختلف شہروں میں واقع گرجا گھروں میں عبادات جاری ہیں جہاں ملک کی سلامتی، خوشحالی اور ترقی کے لیے خصوصی دعائیں کی جا رہی ہیں۔

گوجرخان: دادی کا پوتا بالیاں چور، انصاف مل گیا

دوسری جانب واشنگٹن، لندن، پیرس، ماسکو، دبئی اور دیگر عالمی شہروں کو کرسمس کی رنگا رنگ روشنیوں اور سجاوٹ سے آراستہ کیا گیا ہے۔ ویٹی کن سٹی میں بھی خصوصی عبادات کا اہتمام کیا گیا جہاں پوپ لیو نے حضرت عیسیٰ علیہ السلام کی ولادت کے حالات کا ذکر کیا اور کہا کہ غریبوں اور اجنبیوں کی مدد سے انکار دراصل خدا کو مسترد کرنے کے مترادف ہے۔

فلسطین کے شہر بیت لحم میں واقع تاریخی چرچ آف نیٹی ویٹی میں بھی عقیدت مندوں کا بڑا اجتماع دیکھنے میں آیا۔

ادھر وزیراعظم شہباز شریف نے مسیحی برادری کو کرسمس کی مبارکباد دیتے ہوئے کہا کہ مسیحی بھائی پاکستان میں ایک فعال، مثبت اور پُرامن برادری کے طور پر قابلِ قدر کردار ادا کر رہے ہیں۔ وزیراعظم نے دعا کی کہ یہ کرسمس مسیحی برادری اور ملک کے لیے امن، استحکام اور خوشحالی کا پیغام لے کر آئے۔

ان کا کہنا تھا کہ کرسمس کا دن پوری انسانیت کے لیے محبت، امن، رواداری اور خیرسگالی کا پیغام دیتا ہے۔ ملک کی مجموعی سماجی اور معاشی ترقی میں مسیحی برادری کی مخلصانہ خدمات قابلِ تحسین ہیں اور دہشت گردی کے خلاف جدوجہد میں ان کی قربانیاں پوری قوم کے لیے باعثِ فخر ہیں۔

وزیراعظم نے مزید کہا کہ تعلیم، طب اور دیگر شعبوں میں مسیحی برادری کی گراں قدر خدمات سماجی ہم آہنگی کے فروغ کا باعث ہیں، جبکہ تمام شہریوں کے لیے بلا تفریق حقوق و آزادی کا تحفظ اور پیشہ ورانہ ترقی کے یکساں مواقع فراہم کرنا حکومت کی اولین ترجیحات میں شامل ہے۔