متحدہ قومی موومنٹ (ایم کیو ایم) پاکستان نے وزیراعظم شہباز شریف سے مطالبہ کیا ہے کہ 27ویں آئینی ترمیم میں بلدیاتی حکومتوں کو مکمل اختیارات دیے جائیں۔
وزیراعظم سے ملاقات کرنے والے ایم کیو ایم کے وفد کی قیادت کنوینر ڈاکٹر خالد مقبول صدیقی نے کی، جبکہ وفد میں گورنر سندھ کامران ٹیسوری، وفاقی وزیر صحت سید مصطفیٰ کمال، اور اراکین قومی اسمبلی ڈاکٹر فاروق ستار، جاوید حنیف، سید امین الحق اور خواجہ اظہار الحسن شامل تھے۔
قائمہ کمیٹی داخلہ کے اجلاس میں 4سینیٹرز کے سائبر فراڈیوں کے ہاتھوں لٹنے کا انکشاف
ذرائع کے مطابق ملاقات وزیراعظم ہاؤس میں ہوئی جس میں 27ویں آئینی ترمیم پر تفصیلی تبادلہ خیال کیا گیا۔ ایم کیو ایم رہنماؤں نے وزیراعظم سے درخواست کی کہ مجوزہ ترمیم میں مقامی حکومتوں کو بااختیار بنانے کے لیے ان کے بلدیاتی مسودے کو شامل کیا جائے۔
ذرائع نے بتایا کہ وزیراعظم نے ایم کیو ایم کے بلدیاتی مسودے کو 27ویں آئینی ترمیم میں شامل کرنے کی یقین دہانی کرائی۔ ایم کیو ایم ذرائع کے مطابق مسلم لیگ (ن) نے اس بلدیاتی آئینی مسودے کی مکمل حمایت کا وعدہ کیا ہے، جو ملاقات میں پارٹی کی بنیادی ترجیح تھی۔
ملاقات کے بعد گورنر سندھ کامران ٹیسوری نے میڈیا سے گفتگو میں کہا کہ وزیراعظم نے 27ویں آئینی ترمیم پر اعتماد میں لیا ہے، اور ترمیم کے بلدیاتی پہلوؤں پر تفصیلی مشاورت کی گئی ہے۔
واضح رہے کہ حکومت 27ویں آئینی ترمیم پیش کرنے کی تیاری کر رہی ہے، اور ذرائع کے مطابق یہ ترمیم رواں ماہ ہی پارلیمنٹ کے دونوں ایوانوں سے منظور کرانے کا منصوبہ ہے۔
اسی روز وزیراعظم سے پیپلز پارٹی کے وفد نے بھی ملاقات کی، جس میں مجوزہ ترمیم کی شقوں اور نکات پر تفصیلی گفتگو ہوئی۔ ملاقات کے بعد پیپلز پارٹی کا وفد نور خان ایئر بیس سے خصوصی طیارے کے ذریعے کراچی روانہ ہوا، جہاں شام 7 بجے سینٹرل ایگزیکٹو کمیٹی کا اجلاس طلب کیا گیا ہے۔ اجلاس میں عرفان قادر، راجا پرویز اشرف، نوید قمر اور شیری رحمٰن شرکت کریں گے۔
وزیراعظم کے ہمراہ حکومتی وفد میں اسحاق ڈار، اعظم نذیر تارڑ، احسن اقبال، رانا ثناء اللہ اور اٹارنی جنرل منصور عثمان اعوان شامل تھے۔
دوسری جانب بلوچستان عوامی پارٹی (بی اے پی) کا وفد بھی ساڑھے تین بجے وزیراعظم سے ملاقات کرے گا۔ خالد مگسی کی قیادت میں وفد میں سینیٹر محمد عبدالقادر، منظور کاکڑ، ثمینہ ممتاز اور دنیش کمار شامل ہوں گے۔ ذرائع کے مطابق بی اے پی وفد بلوچستان کے لیے صوبائی اور قومی اسمبلی کی نشستوں میں اضافے کا مطالبہ کرے گا۔
