آسٹریا کے صوبے سالزبرگ کے پہاڑی علاقے میں ایک چھوٹا طیارہ المناک حادثے کا شکار ہو گیا، جس کے نتیجے میں طیارے میں سوار تمام چار افراد جان کی بازی ہار گئے۔
پولیس حکام کے مطابق یہ افسوسناک واقعہ مقامی وقت کے مطابق دوپہر 12 بج کر 45 منٹ پر والڈ اِم پنزگاؤ نامی علاقے کے قریب پیش آیا، جو پہاڑی سلسلے الپس میں واقع ہے۔ جاں بحق ہونے والوں میں تین مرد اور ایک خاتون شامل ہیں، جن کی شہریت تاحال باضابطہ طور پر تصدیق نہیں ہو سکی، تاہم ابتدائی اطلاعات کے مطابق وہ ممکنہ طور پر جرمنی سے تعلق رکھتے تھے۔
حادثے کا شکار ہونے والا طیارہ جرمنی کے شہر میونخ کے قریب ایک ایئر فیلڈ سے پرواز کے لیے روانہ ہوا تھا۔ ذرائع کے مطابق یہ ایک نجی راؤنڈ ٹرپ فلائٹ تھی، یعنی طیارے کو روانگی کے مقام پر ہی واپس آنا تھا۔
حادثے کی اصل وجوہات ابھی تک سامنے نہیں آ سکیں۔ مقامی حکام اور ایوی ایشن ماہرین کی جانب سے تفتیش کا عمل جاری ہے تاکہ طیارہ حادثے کے اسباب معلوم کیے جا سکیں۔
مقامی ریسکیو ٹیمیں فوری طور پر جائے وقوعہ پر پہنچ گئیں اور امدادی کارروائیاں انجام دی گئیں، تاہم بدقسمتی سے تمام مسافر موقع پر ہی جاں بحق ہو چکے تھے۔
