انٹرنیشنل کرکٹ کونسل (آئی سی سی) کی جانب سے ٹی ٹوئنٹی کرکٹ ٹیموں کی تازہ ترین سالانہ رینکنگ جاری کر دی گئی ہے، جس کے مطابق مردوں کی درجہ بندی میں بھارتی ٹیم اور خواتین کے زمرے میں آسٹریلوی ٹیم اپنی پہلی پوزیشن برقرار رکھنے میں کامیاب رہی ہیں۔ تازہ اعداد و شمار کے مطابق مردوں کی رینکنگ میں بھارت کی برتری میں کچھ کمی واقع ہوئی ہے اور اب اس کا دوسرے نمبر پر موجود انگلینڈ سے فرق صرف 13 پوائنٹس رہ گیا ہے، جبکہ آسٹریلیا کی ٹیم اس فہرست میں تیسرے نمبر پر موجود ہے۔
حکومت، پاک افواج اور عوام تمام چیلنجز کیخلاف ‘بُنْيَانٌ مَّرْصُوْص’ کی مانند یکجا ہیں: فیلڈ مارشل
مردوں کی رینکنگ میں دیگر ٹیموں کی پوزیشن کا جائزہ لیا جائے تو نیوزی لینڈ چوتھے، جنوبی افریقہ پانچویں، پاکستان چھٹے اور ویسٹ انڈیز ساتویں نمبر پر براجمان ہیں، جس سے ظاہر ہوتا ہے کہ ان ٹیموں کی پوزیشن میں کوئی تبدیلی نہیں آئی۔ بنگلہ دیش کی ٹیم آٹھویں نمبر پر موجود ہے، تاہم سری لنکا کی ٹیم تنزلی کا شکار ہو کر نویں پوزیشن پر چلی گئی ہے، جبکہ افغانستان کی ٹیم عالمی رینکنگ میں دسویں نمبر پر برقرار ہے۔
خواتین کی ٹی ٹوئنٹی رینکنگ میں عالمی چیمپئن آسٹریلیا کی حکمرانی برقرار ہے، جس کے بعد انگلینڈ کی ٹیم دوسری اور بھارت کی ٹیم تیسری پوزیشن پر موجود ہے۔ پاکستانی خواتین کرکٹ ٹیم کے حوالے سے جاری کردہ اعداد و شمار کے مطابق وہ اس وقت عالمی رینکنگ میں آٹھویں نمبر پر موجود ہے۔ آئی سی سی کی یہ سالانہ رینکنگ ٹیموں کی گزشتہ ایک سال کی کارکردگی اور مختلف سیریز کے نتائج کو مدنظر رکھ کر ترتیب دی گئی ہے۔
