**سائبر کرائم سے بچاؤ: ایک کلک سے اپنی اور خاندان کی ڈیوائسز کو محفوظ بنائیں**
موجودہ دور میں سائبر کرائم کے واقعات میں تیزی سے اضافہ ہو رہا ہے اور آن لائن فراڈ، ڈیٹا چوری اور ہراسانی جیسے خطرات کا سامنا کسی کو بھی ہو سکتا ہے۔ پاکستان سمیت دنیا بھر میں جرائم پیشہ افراد مختلف طریقوں سے شہریوں کو نشانہ بنا رہے ہیں، جبکہ موبائل فونز اور دیگر ڈیوائسز میں موجود ذاتی معلومات بھی چوری یا غلط استعمال کا شکار ہو سکتی ہیں۔
پاکستان ٹیلی کمیونیکیشن اتھارٹی (پی ٹی اے) نے ڈیوائس مینجمنٹ کے حوالے سے ایسے اقدامات متعارف کرائے ہیں جن کی مدد سے صارفین نہ صرف اپنی بلکہ اپنے خاندان کے افراد کی ڈیوائسز کو بھی بہتر طریقے سے محفوظ بنا سکتے ہیں۔
ماہرین کے مطابق سائبر تحفظ کے لیے ضروری ہے کہ:
* اہم دستاویزات، تصاویر اور رابطوں کا باقاعدگی سے بیک اپ محفوظ کلاؤڈ یا بیرونی اسٹوریج ڈیوائس پر رکھا جائے۔
* موبائل، ٹیبلیٹ اور کمپیوٹر سمیت تمام ڈیوائسز کو تازہ ترین سیکیورٹی اپ ڈیٹس اور سافٹ ویئر کے ساتھ اپ ٹو ڈیٹ رکھا جائے۔
* مضبوط پاس ورڈز کے ساتھ فنگر پرنٹ یا چہرے کی شناخت جیسی بائیومیٹرک سیکیورٹی فعال کی جائے۔
* ڈیوائس گم ہونے کی صورت میں حفاظت کے لیے Find My iPhone یا Find My Device جیسی لوکیشن ٹریکنگ سروسز استعمال کی جائیں۔
* بچوں اور خاندان کے دیگر افراد کے تحفظ کے لیے اسکرین ٹائم کنٹرول، ایپ رسائی کی پابندی اور نامناسب مواد کو بلاک کرنے والے فیچرز استعمال کیے جائیں۔
* موبائل فون، ٹیبلیٹ یا کمپیوٹر فروخت کرنے، کسی اور کے حوالے کرنے یا مرمت کے لیے دینے سے پہلے فیکٹری ری سیٹ ضرور کیا جائے تاکہ ذاتی معلومات محفوظ رہیں۔
ماہرین کا کہنا ہے کہ احتیاطی اقدامات اپنا کر سائبر خطرات کو کافی حد تک کم کیا جا سکتا ہے اور اپنی ڈیجیٹل معلومات کو محفوظ بنایا جا سکتا ہے۔
