اسرائیلی اخبار نے دعویٰ کیا ہے کہ غزہ میں تعینات کی جانے والی بین الاقوامی فورس میں پاکستان کے فوجی دستے بھی شامل ہو سکتے ہیں۔ اسرائیلی اخبار ٹائمز آف اسرائیل کے مطابق، اسرائیلی دفاعی حکام نے قانون سازوں کو بریفنگ دیتے ہوئے بتایا کہ دو سالہ جنگ کے بعد غزہ میں امن و استحکام قائم کرنے کے لیے جو بین الاقوامی فورس تشکیل دی جا رہی ہے، اس میں پاکستانی فوج کی شمولیت کا امکان موجود ہے۔
اسلام آباد میں پٹرول پمپ پر ڈکیتی کی بڑی واردات
اسرائیلی ویب سائٹ وائی نیٹ نیوز کی رپورٹ میں کہا گیا کہ گزشتہ ہفتے اسرائیلی کنیسٹ کی خارجہ و دفاعی امور کمیٹی کے بند کمرہ اجلاس میں بتایا گیا کہ اس فورس میں انڈونیشیا، آذربائیجان اور پاکستان کے فوجی اہلکار شامل ہو سکتے ہیں۔
رپورٹ کے مطابق انڈونیشیا پہلے ہی اس مشن میں اپنی فوج بھیجنے کی پیشکش کر چکا ہے، جبکہ آذربائیجان نے بھی اپنے فوجی فراہم کرنے پر آمادگی ظاہر کی ہے۔ تاہم پاکستانی فوج کی ممکنہ شمولیت کے حوالے سے ابھی تک کوئی باضابطہ اعلان یا عوامی سطح پر تصدیق سامنے نہیں آئی۔
گزشتہ روز وفاقی وزیر اطلاعات عطااللہ تارڑ نے اس حوالے سے کہا تھا کہ غزہ میں پاکستانی فوج کی تعیناتی کے بارے میں تفصیلی جواب وزارت خارجہ فراہم کرے گی۔
