ایران کی وزارتِ خارجہ کے ترجمان اسماعیل بقائی نے کہا ہے کہ ایران اس وقت امریکا کے ساتھ کسی نئے مذاکراتی مرحلے کا آغاز کرنے کا ارادہ نہیں رکھتا۔
ان کے مطابق موجودہ صورتحال میں تہران کی جانب سے واشنگٹن کے ساتھ براہِ راست بات چیت سے متعلق کسی پیش رفت پر غور نہیں کیا جا رہا۔
محسن نقوی کی امریکی سفیر سے ملاقات، علاقائی صورتحال پر گفتگو
اسماعیل بقائی نے مزید کہا کہ امریکا نے یہ ظاہر کیا ہے کہ وہ سفارتی عمل کو آگے بڑھانے میں سنجیدہ نہیں ہے۔
انہوں نے بتایا کہ امریکا نے سیز فائر کی خلاف ورزی کی ہے اور ایران نے اس حوالے سے ثالث پاکستان کو آگاہ کر دیا ہے۔
ان کا کہنا تھا کہ دونوں ممالک کے درمیان اختلافات اب بھی برقرار ہیں، جس کے باعث فوری طور پر مذاکرات کا کوئی امکان دکھائی نہیں دیتا۔
سیاسی تجزیہ کاروں کے مطابق ایران اور امریکا کے درمیان حالیہ کشیدگی، بحری ناکہ بندی اور جوہری پروگرام سے متعلق امور نے مذاکراتی عمل کو مزید پیچیدہ بنا دیا ہے، جبکہ خطے میں جاری تنازعات اور اعتماد کی کمی نے بھی دونوں ممالک کے درمیان فاصلے بڑھا دیے ہیں۔
ماہرین کے نزدیک اگر کشیدگی میں کمی نہ آئی تو قریب مستقبل میں مذاکرات کی بحالی مشکل ہو سکتی ہے اور اس کے اثرات خطے میں امن کے امکانات پر بھی پڑ سکتے ہیں۔
