(سپیشل کراسپنڈنٹ)
ایران نے مبینہ طور پر امریکی نائب صدر جے ڈی وینس کو ایک خفیہ پیغام میں دعویٰ کیا ہے کہ امریکی صدر ڈونلڈ ٹرمپ کے داماد جیرڈ کشنر اور امریکی نمائندہ اسٹیو وٹکوف جاری مذاکراتی عمل کو ذاتی مالی مفادات کے لیے استعمال کر رہے ہیں۔
امریکی ویب سائٹ **دی نیوز ری پبلک** کی رپورٹ کے مطابق یہ پیغام جون میں سوئٹزرلینڈ میں ہونے والے مذاکرات کے دوران ایک ثالث کے ذریعے جے ڈی وینس تک پہنچایا گیا۔
رپورٹ میں دعویٰ کیا گیا ہے کہ ایرانی حکام نے وینس کو خبردار کیا کہ جیرڈ کشنر اور اسٹیو وٹکوف کی مذاکراتی عمل میں شمولیت 17 جون کے فریم ورک کو مستقل معاہدے کی شکل دینے کی کوششوں کو متاثر کر سکتی ہے۔
رپورٹ کے مطابق ایرانی حکام کا مؤقف ہے کہ دونوں شخصیات مذاکرات کے دوران حاصل ہونے والی اندرونی معلومات کو مالیاتی منڈیوں میں مبینہ طور پر غیر قانونی مالی فائدہ حاصل کرنے کے لیے استعمال کرنے میں دلچسپی رکھتی ہیں۔
مزید یہ بھی دعویٰ کیا گیا کہ ایرانی مذاکرات کاروں نے الزام عائد کیا ہے کہ جیرڈ کشنر مذاکرات کی اندرونی تفصیلات بارہا اسرائیلی وزیراعظم بنجمن نیتن یاہو تک پہنچاتے رہے۔ ایرانی حکام کے اندازے کے مطابق، مبینہ طور پر اندرونی معلومات کے غلط استعمال سے حاصل ہونے والے مالی فوائد کی مالیت جون تک 9 ارب ڈالر تک پہنچ چکی تھی۔
دوسری جانب وائٹ ہاؤس نے ان دعوؤں کو مسترد کر دیا ہے۔ وائٹ ہاؤس کی ترجمان انا کیلی کا کہنا ہے کہ ایسا کوئی خفیہ پیغام امریکی حکام کو موصول نہیں ہوا اور مذکورہ رپورٹ ایران کے بے بنیاد مؤقف کو آگے بڑھانے کی کوشش ہے۔ ان کے مطابق رپورٹ میں کیے گئے تمام دعوے حقیقت پر مبنی نہیں ہیں۔
واضح رہے کہ رپورٹ میں کیے گئے الزامات کی آزادانہ طور پر تصدیق نہیں ہو سکی ہے، جبکہ متعلقہ فریقین نے ان دعوؤں کو مسترد کیا ہے۔
