(سپیشل کراسپنڈنٹ)
امریکی نائب صدر جے ڈی وینس نے کہا ہے کہ اسرائیل امریکا میں عوامی رائے کے میدان میں مشکلات کا سامنا کر رہا ہے اور یہ ایک واضح حقیقت ہے۔
امریکی پوڈکاسٹر جو روگن کے ساتھ گفتگو میں جے ڈی وینس نے کہا کہ اسرائیل امریکا کا اہم اتحادی ہے، تاہم وہ امریکی سیاست اور پالیسی سازی پر اثر انداز ہونے کی کوشش کرتا ہے۔
جب ان سے پوچھا گیا کہ کیا اسرائیل امریکی سیاست پر اثر ڈالنے کی کوشش کرتا ہے، تو وینس نے جواب دیا کہ "جی ہاں، اسرائیل اس معاملے میں مؤثر کردار ادا کرتا ہے۔”
یہ بیان ایسے وقت میں سامنے آیا ہے جب امریکا میں اسرائیل کے بارے میں عوامی رائے میں تبدیلی دیکھی جا رہی ہے۔ مارچ میں کیے گئے ایک سروے کے مطابق اسرائیل کے بارے میں مثبت رائے رکھنے والے امریکیوں کی تعداد کم ہوئی، جبکہ منفی رائے میں اضافہ ہوا۔
سروے کے مطابق 32 فیصد امریکیوں نے اسرائیل کے بارے میں مثبت رائے کا اظہار کیا، جبکہ 39 فیصد نے منفی رائے دی۔ ماہرین کے مطابق یہ گزشتہ چند برسوں کے دوران عوامی سوچ میں نمایاں تبدیلی کی نشاندہی کرتا ہے۔
اسرائیل کی حمایت میں سب سے زیادہ کمی ڈیموکریٹس اور آزاد ووٹرز میں ریکارڈ کی گئی۔ 2013 کے مقابلے میں اسرائیل کے لیے مثبت رائے رکھنے والے افراد کی شرح 34 فیصد سے کم ہو کر 17 فیصد رہ گئی ہے۔
خاص طور پر نوجوان امریکیوں میں اسرائیل کے حوالے سے تنقیدی خیالات میں اضافہ دیکھا جا رہا ہے۔
