سابق نگران وزیر اعظم سینیٹر انوار الحق کاکڑ نے کہا ہے کہ افغانستان سے تجارت صرف قانونی طریقے سے ممکن ہے اور اسمگلنگ کے خاتمے سے فائدہ پاکستانی عوام کو ہی پہنچے گا۔
آئی ایس پی آر کے زیر اہتمام نوجوانوں کی فکری تربیت کے لیے "ونٹر انٹرن شپ 2026” کا انعقاد کیا گیا، جس میں سینیٹر انوار الحق کاکڑ نے طلباء کے ساتھ خصوصی نشست میں بلوچستان کے حوالے سے فتنہ الہندوستان کے گمراہ کن پروپیگنڈے کو آشکار کیا۔
پنجاب میں بسنت سے قبل دفعہ 144 کے تحت سخت پابندیاں عائد
سینیٹر انوار الحق کاکڑ نے کہا کہ شدت پسند عناصر نے بلوچستان کے حوالے سے جھوٹے اور گمراہ کن بیانیے کے تحت مسلح گروہ اور جتھے تشکیل دیے ہیں۔ یہ گروہ دلیل اور مکالمے پر یقین نہیں رکھتے کیونکہ ان کی دلچسپی مفاہمت میں نہیں بلکہ تصادم اور بدامنی میں ہے۔
انہوں نے کہا کہ عوام کے جان و مال کے دشمن ان مسلح جتھوں کو جواب دینا ریاستی اداروں کا آئینی اور قانونی حق ہے اور علاقائی سیکیورٹی کے تناظر میں افواج پاکستان محدود بجٹ اور وسائل کے باوجود مؤثر حکمت عملی اپنائے ہوئے ہیں۔
سینیٹر انوار الحق کاکڑ نے بتایا کہ ماضی کے برعکس آج بلوچستان میں ہزاروں اسکول، کالجز اور درجنوں یونیورسٹیز کے ساتھ اسپتال بھی فعال ہیں، جبکہ وفاقی حکومت کے تعاون سے کاروباری طبقہ اور سیاسی قیادت دونوں میں مقامی افراد نمایاں طور پر آگے بڑھ رہے ہیں۔
ان کا کہنا تھا کہ بلوچستان میں مفاہمت، ہم آہنگی اور ترقی کے لیے ریاست، میڈیا اور عوام سب کو مشترکہ ذمہ داری نبھانی ہوگی، اور صرف عوام کے ذریعے شرپسند عناصر کے منفی بیانیے کا تدارک اور پائیدار امن قائم کیا جا سکتا ہے۔
