بابائے قوم قائد اعظم محمد علی جناح کا 149 واں یومِ پیدائش آج ملک بھر میں انتہائی عقیدت، احترام اور ملی جوش و خروش کے ساتھ منایا جا رہا ہے، اس موقع پر آج ملک میں عام تعطیل ہے۔
بانی پاکستان کے یومِ پیدائش کے موقع پر مزار قائد پر گارڈز کی تبدیلی کی پروقار تقریب منعقد ہوئی جس کے مہمانِ خصوصی میجر جنرل افتخار حسین چوہدری (ہلالِ امتیاز) تھے۔ تقریب کے دوران پاک فوج کے چاق و چوبند دستے نے مزار قائد پر سلامی پیش کی جبکہ پاک فوج کے کیڈٹس نے گارڈز کے فرائض سنبھال لیے۔
قائداعظم کے سنہری اصول درخشاں قومی مستقبل کی ضمانت ہیں: وزیراعظم
قائد اعظم کے یومِ پیدائش پر آج دن بھر سرکاری اور غیر سرکاری سطح پر مختلف تقریبات کا انعقاد کیا جا رہا ہے جن میں بابائے قوم کی مسلمانانِ ہند اور قیامِ پاکستان کے لیے کی گئی انتھک اور ناقابلِ فراموش خدمات کو خراجِ عقیدت پیش کیا جا رہا ہے۔
قائد اعظم محمد علی جناح 25 دسمبر 1876 کو کراچی میں پیدا ہوئے۔ وہ پیشے کے اعتبار سے وکیل اور ایک مدبر سیاست دان تھے جنہوں نے اپنی بے مثال قائدانہ صلاحیتوں سے ایک آزاد ریاست کے خواب کو حقیقت میں بدلا۔ ایمان، اتحاد اور تنظیم پر مبنی اصول قائد اعظم کی زندگی کا نچوڑ تھے، انہوں نے اپنے کردار اور عمل سے دنیا کو یہ دکھایا کہ ایک سچی اور دیانت دار قیادت قوموں کی تقدیر کیسے بدل سکتی ہے۔
نہرو، پٹیل اور گاندھی جیسے بڑے سیاسی رہنماؤں کی موجودگی کے باوجود قائد اعظم نے اپنی قوم کو پاکستان کی منزل تک پہنچایا۔ ان کا خواب ایک ایسا پاکستان تھا جہاں ہر شہری کو مساوی حقوق اور آزادی حاصل ہو۔
قائد اعظم محمد علی جناح دنیا کی ان چند عظیم شخصیات میں شامل ہیں جنہوں نے تاریخ کا دھارا موڑ دیا اور دو قومی نظریے کی بنیاد پر برصغیر کے مسلمانوں کے لیے ایک علیحدہ وطن حاصل کیا، مسلمانوں پر ان کا یہ عظیم احسان کبھی فراموش نہیں کیا جا سکتا۔
وزیراعظم شہباز شریف نے بھی قائد اعظم محمد علی جناح کو خراجِ عقیدت پیش کرتے ہوئے اپنے پیغام میں کہا کہ بابائے قوم نے بلا تفریق رنگ و نسل، مذہبی ہم آہنگی، معاشرتی رواداری اور انصاف جیسے رہنما اصولوں کا درس دیا۔ انہوں نے کہا کہ قائد اعظم کے افکار آج بھی قوم کے لیے مشعلِ راہ ہیں۔
افواجِ پاکستان، آرمی چیف اور چیف آف ڈیفنس فورسز فیلڈ مارشل عاصم منیر نے بھی بابائے قوم کو خراجِ عقیدت پیش کیا۔ افواجِ پاکستان نے قائد اعظم کے مضبوط، خودمختار، جمہوری اور خوشحال پاکستان کے وژن سے اپنی غیر متزلزل وابستگی کا اعادہ کرتے ہوئے قومی استحکام، امن اور ترقی کے لیے بھرپور کردار ادا کرنے کے عزم کا اظہار کیا۔
