اسلام آباد میں پہلی بار سیون اسٹار ہوٹل اور نیا کنونشن سینٹر تعمیر کرنے کی منظوری دے دی گئی ہے۔ چیئرمین سی ڈی اے محمد علی رندھاوا کا کہنا ہے کہ تمام منصوبے اعلیٰ معیار کے مطابق اور مقررہ مدت میں مکمل کیے جائیں گے۔ نئے کنونشن سینٹر میں ایکسپو اور ایگزیبیشن مرکز بھی شامل ہوگا۔
ٹرمپ کا روس، یوکرین جنگ روکنے کیلئے امن منصوبہ سامنے آگیا
اعلامیے کے مطابق جدید کنونشن سینٹر کی مجموعی لاگت 19 ارب 37 کروڑ روپے ہوگی اور اسے 18 ماہ میں مکمل کرنے کا ہدف ہے۔ یہ سینٹر قومی اور بین الاقوامی تقریبات کا مرکزی مقام بنے گا، جبکہ 2027 میں شنگھائی تعاون تنظیم (SCO) کا سربراہی اجلاس بھی نئے کنونشن سینٹر میں ہی ہوگا۔
سی ڈی اے نے وفاقی دارالحکومت میں پہلا سیون اسٹار ہوٹل بھی تعمیر کرنے کے لیے عالمی فرموں کو پبلک پرائیویٹ پارٹنرشپ یا جوائنٹ وینچر کے تحت منصوبہ مکمل کرنے کی دعوت دی ہے۔ ریڈ زون میں تعمیر ہونے والے اس ہوٹل میں عالمی معیار کے کانفرنس ہال، سیمینار ہال، بینکوئٹ ہال، کمروں کے علاوہ ملٹی اسٹوری پارکنگ اور جدید سیکیورٹی سسٹمز بھی نصب کیے جائیں گے۔ ہوٹل کے لیے عالمی ٹینڈر بھی جاری کر دیا گیا ہے۔
اجلاس میں اسلام آباد کے مختلف مقامات پر چھ اسٹیل پیڈسٹرین برج تعمیر کرنے کی منظوری بھی دی گئی، جن پر 5 ارب 74 کروڑ روپے کی لاگت آئے گی۔
