بنگلادیش ویمن کرکٹ ٹیم کا دورہ بھارت ملتوی ہو گیا ہے۔
بھارتی میڈیا کے مطابق بنگلادیش ویمن ٹیم نے دسمبر میں تین ون ڈے اور تین ٹی ٹوئنٹی میچز کی سیریز کھیلنے بھارت کا دورہ کرنا تھا۔ بنگلادیش اور بھارت ویمن ٹیموں کے درمیان یہ سیریز آئی سی سی ویمنز چیمپئن شپ کا حصہ تھی۔
کرکٹ کی ویب سائٹ کے مطابق بنگلادیش کرکٹ بورڈ کے ترجمان نے ویمنز ٹیم کے دورہ بھارت کے ملتوی ہونے کی تصدیق کردی ہے۔
ویب سائٹ کے مطابق ترجمان بنگلادیش کرکٹ بورڈ کا بتانا ہے کہ بی سی سی آئی نے خط کے ذریعے ہمیں دورہ ملتوی ہونے سے متعلق آگاہ کیا اور دورے کو دوبارہ شیڈول کرنے کا بتایا گیا۔ دورے کو ملتوی کرنے کی کوئی ٹھوس وجہ نہیں بتائی گئی۔
یاد رہے کہ بی سی سی آئی نے اگست میں بھارتی مینز ٹیم کا دورہ بنگلادیش بھی ملتوی کیا تھا، بھارتی ٹیم اب اگلے سال ستمبر میں بنگلادیش کا دورہ کرے گی۔
