پشاور:
خیبر پختونخوا کی صوبائی کابینہ کی تشکیل سے متعلق تفصیلات سامنے آ گئی ہیں۔
ذرائع کے مطابق نومنتخب وزیراعلیٰ سہیل آفریدی نے کابینہ کے لیے مشاورت مکمل کر لی ہے، جس میں پرانے اور نئے چہرے شامل کیے جا رہے ہیں۔ ممکنہ کابینہ ارکان کی فہرست وزیراعلیٰ اپنے ساتھ بانی چیئرمین عمران خان سے مشاورت کے لیے لے گئے ہیں۔
عمران خان کا پیغام پہنچانے پر اگر میں ملزم ہوں تو پھر کل پوری قوم ملزم بنے گی، علیمہ خان
سابق صوبائی وزیر مینا خان کا کہنا ہے کہ کابینہ بانی چیئرمین عمران خان سے مشاورت کے بعد تشکیل دی جائے گی، تاہم اگر ملاقات نہ ہو سکی تو کابینہ دو مراحل میں بنائی جائے گی۔
دریں اثنا وزیراعلیٰ سہیل آفریدی بانی پی ٹی آئی عمران خان سے ملاقات کے لیے روانہ ہوئے۔ انہوں نے کہا کہ وہ کروڑوں عوام کی نمائندگی کرتے ہیں اور کوشش ہوگی کہ بانی چیئرمین سے ملاقات ہو جائے۔
ان کا مزید کہنا تھا کہ صوبائی کابینہ کے حوالے سے جو فہرست سوشل میڈیا پر گردش کر رہی ہے وہ جعلی ہے، حتمی فیصلہ عمران خان سے مشاورت کے بعد ہی کیا جائے گا۔
