بھارت کی ریاست کرناٹکا میں مشہور رئیلٹی شو "بگ باس کناڈا سیزن 12” کو ماحولیاتی قوانین کی خلاف ورزی پر اچانک بند کر دیا گیا۔
کرناٹک اسٹیٹ پولوشن کنٹرول بورڈ (KSPCB) نے کارروائی کرتے ہوئے شو کے اسٹوڈیو کو سیل کر دیا اور تمام شرکا کو فوری طور پر گھر خالی کرنے کا حکم دیا۔ بورڈ کے مطابق اسٹوڈیو نے ضروری اجازت نامے حاصل نہیں کیے تھے اور ماحولیاتی ضوابط کی کھلم کھلا خلاف ورزی کر رہا تھا۔ حکام نے فوری طور پر تمام سرگرمیاں بند کرنے اور بجلی کا کنکشن منقطع کرنے کے احکامات جاری کیے۔
نوٹس ملنے کے بعد انتظامیہ نے شو میں شریک تمام افراد کو راتوں رات گھر خالی کرنے کی ہدایت دی، جس کے بعد شرکا کو سیکیورٹی کے تحت ایگلٹن ریزورٹ منتقل کیا گیا۔ اس کارروائی کے نتیجے میں سات سو سے زائد افراد، جن میں ٹیکنیکل ٹیم، لائٹنگ اسٹاف، کیمرہ آپریٹرز اور دیگر عملہ شامل تھا، بے روزگار ہو گئے۔
یہ بگ باس ہاؤس اداکار کچا سدیپ کے وژن پر بنایا گیا تھا، جسے ایک شاندار محل کی طرز پر تقریباً پانچ کروڑ روپے کی لاگت سے تیار کیا گیا تھا۔ شو کا آغاز چند ہفتے قبل بڑے جوش و خروش سے کیا گیا تھا۔
ریاستی وزیر ماحولیات و جنگلات نے تصدیق کی کہ اسٹوڈیو کو متعدد بار نوٹس بھیجے گئے تھے مگر انتظامیہ نے انہیں نظر انداز کیا۔ ان کے مطابق ماحولیاتی اصولوں کی پاسداری ضروری تھی، لیکن عمل درآمد نہیں کیا گیا۔
معائنے کے دوران پتہ چلا کہ جولی ووڈ اسٹوڈیوز سے بغیر صاف کیا ہوا گندا پانی خارج کیا جا رہا تھا، سیوریج ٹریٹمنٹ پلانٹ غیر فعال تھا، کچرا مناسب طریقے سے الگ نہیں کیا جا رہا تھا، اور دو بڑے ڈیزل جنریٹر مسلسل چل رہے تھے جن سے آلودگی میں اضافہ ہو رہا تھا۔
بگ باس کناڈا سیزن 12 کو سب سے بڑا اور شاندار سیزن قرار دیا جا رہا تھا، مگر اس اچانک بندش نے شائقین کو مایوس کر دیا اور سوشل میڈیا پر بحث چھیڑ دی۔ حکام نے منتظمین کو مشورہ دیا ہے کہ اگر وہ چاہیں تو عدالت سے رجوع کر سکتے ہیں۔
