وفاقی وزیر انجینئر امیر مقام کا تین روزہ دورہ گلگت بلتستان، سیلاب متاثرہ علاقوں کا جائزہ

وفاقی وزیر برائے امور کشمیر، گلگت بلتستان و سیفران، انجینئر امیر مقام تین روزہ سرکاری دورے پر گلگت پہنچ گئے۔ یہ دورہ وزیراعظم کی خصوصی ہدایت پر کیا جا رہا ہے۔ گلگت ایئرپورٹ پر ان کا پرتپاک استقبال کیا گیا، جہاں صوبائی وزیر انجینئر محمد انور، کمشنر گلگت اور دیگر اعلیٰ حکام موجود تھے۔ ان کے ہمراہ سیکرٹری ظفر حسن اور وزارت کے دیگر اعلیٰ افسران بھی ہیں۔

دورے کے دوران انجینئر امیر مقام سیلاب سے متاثرہ علاقوں کا دورہ کریں گے، امدادی کارروائیوں کا خود جائزہ لیں گے اور متاثرین سے ملاقات کر کے ان کے مسائل سنیں گے۔ ان کا کہنا ہے کہ وفاقی حکومت متاثرہ افراد کی مکمل مدد کے لیے پرعزم ہے اور تمام دستیاب وسائل بروئے کار لائے جا رہے ہیں۔ گلگت بلتستان کے اعلیٰ حکام اور وفاقی ادارے انہیں حالات پر بریفنگ دیں گے۔

وفاقی وزیر کے استقبال کے لیے سابق معاون خصوصی فاروق میر، سابق وزیر تعمیرات ڈاکٹر محمد اقبال، سابق وزیر قانون اورنگزیب ایڈووکیٹ، مسلم لیگ (ن) یوتھ ونگ کے صدر ذوالفقار علی المعروف "تتو سرکار”، مسلم اسٹوڈنٹس فیڈریشن (ن) کے صدر رضوان راٹھور، سینئر رہنما محمد ثابت اور نائب صدر ساجد علی بھی موجود تھے۔