دنیا بھر میں وقت کی پیمائش اور گھڑیوں کے نظام کی نگرانی کرنے والے عالمی ادارے نے لیپ سیکنڈ کو ختم کرنے کا فیصلہ کر لیا ہے۔ کئی دہائیوں سے زمین کی گردش میں ہونے والی تبدیلیوں کے باعث عالمی معیاری وقت کو زمین کی قدرتی گردش کے ساتھ ہم آہنگ رکھنے کے لیے لیپ سیکنڈ کا اضافہ کیا جاتا رہا ہے۔
1972 سے اب تک عالمی گھڑیوں میں 27 مرتبہ ایک ایک سیکنڈ کا اضافہ کیا جا چکا ہے تاکہ جوہری گھڑیوں کے وقت کو زمین کی قدرتی گردش کے مطابق رکھا جا سکے۔ تاہم، 15 اکتوبر کو عالمی ادارہ برائے اوزان و پیمائش کے تحت منعقد ہونے والی کانفرنس میں لیپ سیکنڈ کو ختم کرنے کا فیصلہ کیا گیا۔
مالی سال 25-2024: بلوچستان حکومت کی آڈٹ رپورٹ میں 37 ارب سے زائد کی بے ضابطگیوں کا انکشاف
دنیا بھر میں معیاری وقت کے لیے کوآرڈینیٹڈ یونیورسل ٹائم (UTC) استعمال کیا جاتا ہے۔ یہ نظام جوہری گھڑیوں کی مدد سے وقت کا حساب رکھتا ہے، جبکہ لیپ سیکنڈ کے ذریعے اسے زمین کی گردش کے ساتھ ہم آہنگ رکھنے کی کوشش کی جاتی رہی ہے۔
زمین کی گردش کی رفتار میں مسلسل کمی بیشی ہوتی رہتی ہے، جس کے باعث جوہری گھڑیوں کے وقت اور زمین کی گردش کے درمیان فرق پیدا ہو جاتا ہے۔ اس فرق کو پورا کرنے کے لیے عالمی معیاری وقت میں ایک اضافی سیکنڈ شامل کیا جاتا رہا ہے۔
اگرچہ لیپ سیکنڈ کا یہ معمولی فرق عام زندگی میں محسوس نہیں ہوتا، تاہم ڈیجیٹل انفراسٹرکچر، نیوی گیشن سسٹمز، ٹیلی کمیونیکیشن اور انٹرنیٹ سرورز کے لیے یہ تکنیکی مسائل پیدا کر سکتا ہے۔
حالیہ برسوں میں زمین کی گردش کی رفتار میں تیزی دیکھی گئی ہے، جس کے نتیجے میں مثبت لیپ سیکنڈ کے بجائے منفی لیپ سیکنڈ کی ضرورت محسوس ہونے لگی تھی۔ اس بات کا امکان تھا کہ 2035 تک ایک سیکنڈ کو منہا کرنا پڑ سکتا ہے تاکہ عالمی معیاری وقت کو زمین کی گردش کے ساتھ ہم آہنگ رکھا جا سکے۔
ماہرین کو خدشہ تھا کہ اگر پہلی مرتبہ وقت میں سے ایک سیکنڈ کم کرنا پڑا تو اس کے لیے تیار نہ ہونے والے بعض کمپیوٹر سسٹمز میں خرابیاں پیدا ہو سکتی ہیں۔ لیپ سیکنڈ کو ختم کرنے کے فیصلے کا ایک اہم مقصد ایسے تکنیکی خطرات کو کم کرنا ہے۔
اسی وجہ سے عالمی ادارے کی کانفرنس میں 69 رکن ممالک نے متفقہ طور پر مئی 2027 سے لیپ سیکنڈ کو مکمل طور پر ختم کرنے کی منظوری دے دی ہے۔
لیپ سیکنڈ کے خاتمے کے بعد لیپ آور کا نظام متعارف کرانے کی تجویز ہے۔ اس نئے نظام کے تحت عالمی معیاری وقت کو زمین کی گردش کے ساتھ ہر چند سال بعد ایک سیکنڈ کے فرق سے ہم آہنگ کرنے کی ضرورت نہیں رہے گی۔
اس کے بجائے عالمی معیاری وقت اور زمین کی گردش کے درمیان فرق کو وقت کے ساتھ بڑھنے دیا جائے گا، جس کی زیادہ سے زیادہ حد ایک گھنٹہ مقرر کی گئی ہے۔ اس حد تک پہنچنے میں کئی صدیاں یا اس سے بھی زیادہ وقت لگ سکتا ہے۔
