اسلام آباد: پاکستان تحریک انصاف (پی ٹی آئی) اور حکام کے درمیان جاری پسِ پردہ رابطوں کے حوالے سے ایک اہم پیشرفت سامنے آئی ہے۔ اطلاعات کے مطابق پہلی مرتبہ سابق وزیراعظم عمران خان کے اہلِ خانہ بھی ان رابطوں میں براہِ راست شامل ہوگئے ہیں، جس کے بعد آئندہ چند روز میں کسی ممکنہ پیشرفت کے امکانات ظاہر کیے جا رہے ہیں۔
عمران خان کے اہلِ خانہ کی ان رابطوں میں شمولیت کو ملک میں بڑھتی ہوئی سیاسی کشیدگی کم کرنے اور عمران خان، ان کے خاندان اور پی ٹی آئی کو درپیش مسائل کو مسلسل محاذ آرائی کے بجائے بات چیت کے ذریعے حل کرنے کی کوششوں میں ایک اہم پیشرفت قرار دیا جا رہا ہے۔
صوابی میں پولیس کی گاڑی پر نامعلوم افراد کی فائرنگ، 2 اہلکار شہید
نئے حالات سے واقف ذرائع کے مطابق حالیہ رابطوں کے نتیجے میں پہلے ہی کچھ پیشرفت ہوچکی ہے، جس میں عمران خان کے اہلِ خانہ اور ان کی بہنوں کی ملاقات کا انتظام بھی شامل ہے۔ اس پیشرفت کو مزید رابطوں کے لیے سازگار ماحول پیدا کرنے کی جانب ایک مثبت قدم قرار دیا جا رہا ہے۔
یہ توقع بھی ظاہر کی جا رہی ہے کہ آئندہ چند روز میں ان رابطوں کے نتیجے میں کچھ ٹھوس نتائج سامنے آسکتے ہیں اور ممکن ہے کہ عمران خان کی دو بہنوں کو بھی اگلے چند روز میں رہائی مل جائے، تاہم اب تک ان کی رہائی کے حوالے سے کوئی باضابطہ اعلان یا تصدیق سامنے نہیں آئی۔
ذرائع کے مطابق پسِ پردہ رابطوں کے اس نئے عمل میں پی ٹی آئی کے اہم رابطہ کاروں کے علاوہ بعض حکومتی اور سرکاری حلقے بھی شامل ہیں۔ تاہم ان رابطوں میں شریک افراد فی الحال اپنی شناخت ظاہر کرنے یا عوامی سطح پر اپنے کردار کا اعتراف کرنے کے لیے تیار نہیں ہیں۔
خیال کیا جا رہا ہے کہ پی ٹی آئی کے چیئرمین بیرسٹر گوہر علی خان ان رابطوں میں اہم کردار ادا کر رہے ہیں۔ تاہم جب اس معاملے پر تبصرے کے لیے ان سے رابطہ کیا گیا تو انہوں نے مبینہ رابطوں کے کسی بھی پہلو پر بات کرنے سے گریز کیا اور کہا کہ وہ ایسے معاملات پر تبصرہ نہیں کرسکتے۔
دوسری جانب عمران خان کے بہنوئی احد خان کو ذرائع ابلاغ کے نمائندوں سے گفتگو کے دوران ان پسِ پردہ رابطوں کا اعتراف کرتے ہوئے سنا گیا ہے۔ یہ پیشرفت ایسے وقت میں سامنے آئی ہے جب ملک میں سیاسی کشیدگی مسلسل بڑھ رہی ہے اور بار بار کی محاذ آرائی، ایک دوسرے کے خلاف عوامی بیانات اور سخت لب و لہجے کے باوجود کوئی بامعنی پیشرفت سامنے نہیں آسکی۔
اس کے برعکس جاری سیاسی تعطل کے باعث پی ٹی آئی کی قیادت، عمران خان کے اہلِ خانہ اور حکام کو درپیش مشکلات میں مزید اضافہ ہوا ہے۔ اس عمل سے واقف افراد کا کہنا ہے کہ عمران خان کے اہلِ خانہ کی شمولیت سے رابطوں کے مزید راستے کھل سکتے ہیں اور زیادہ تعمیری انداز میں معاملات آگے بڑھانے کی گنجائش پیدا ہوسکتی ہے۔
بظاہر ان رابطوں کا بنیادی مقصد متنازع معاملات کو مذاکرات اور باہمی رابطوں کے ذریعے حل کرنا ہے تاکہ سیاسی اختلافات مزید شدت اختیار نہ کریں۔ عمران خان کے اہلِ خانہ کی شمولیت کو اس لیے بھی اہم قرار دیا جا رہا ہے کہ عمران خان اور ان کے رشتہ داروں سے متعلق معاملات بتدریج وسیع تر سیاسی محاذ آرائی کا حصہ بنتے جا رہے ہیں۔
اگرچہ جاری رابطوں کے ممکنہ نتائج کے بارے میں فی الحال کوئی حتمی رائے قائم کرنا قبل از وقت ہوگا، تاہم مبینہ پیشرفت، ملاقات کا انتظام اور فوری ریلیف ملنے کے امکانات سے ظاہر ہوتا ہے کہ پسِ پردہ رابطوں کا یہ عمل اب ایک زیادہ اہم مرحلے میں داخل ہوسکتا ہے۔
ایک ذریعے کے مطابق ان رابطوں کا مقصد آئندہ چند روز میں بات چیت کو ٹھوس اقدامات میں تبدیل کرنا ہے۔ ذریعے نے مزید کہا کہ یہ رابطے پی ٹی آئی اور حکام کے درمیان وسیع تر مفاہمت کی راہ بھی ہموار کرسکتے ہیں۔
ذریعے کا کہنا تھا کہ اگر یہ کوششیں کامیاب رہیں تو یہ نیا عمل سیاسی محاذ آرائی میں تبدیلی کا نقطۂ آغاز ثابت ہوسکتا ہے اور مذاکرات کے ذریعے ملک میں سیاسی کشیدگی کم کرنے کی راہ ہموار ہوسکتی ہے۔
