حکومت پنجاب نے تعلیمی اداروں میں موسم گرما کی تعطیلات 31 اگست تک بڑھانے سے متعلق خبروں کو مسترد کردیا ہے۔
سوشل میڈیا پر یہ اطلاعات گردش کر رہی تھیں کہ مون سون کی شدید بارشوں اور ممکنہ سیلاب کے باعث پنجاب میں موسم گرما کی چھٹیاں مزید بڑھائی جا سکتی ہیں۔ تاہم وزیر تعلیم پنجاب رانا سکندر حیات نے واضح کیا ہے کہ تعطیلات میں توسیع کی کوئی تجویز زیر غور نہیں اور اس حوالے سے کوئی نیا نوٹیفکیشن بھی جاری نہیں کیا گیا۔
سرکاری ذرائع کے مطابق صوبے کے دریاؤں میں فی الحال ایسی سیلابی صورتحال نہیں جس کے باعث تعلیمی سرگرمیاں مزید معطل کی جائیں۔
وزیر تعلیم نے تمام اسکولوں کو ہدایت کی ہے کہ **24 اگست سے پہلے کسی بھی تعلیمی ادارے کو کھولنے کی اجازت نہیں ہوگی**۔ ان کے مطابق طلبہ کے تعلیمی نقصان کے ازالے کے لیے تعطیلات کے دوران ایک ماہ کے ’’ریمیڈیل لرننگ کیمپ‘‘ کا انتظام بھی کیا گیا ہے تاکہ طلبہ نئے تعلیمی سال کے لیے بہتر تیاری کرسکیں۔
حکومت کے مطابق پنجاب میں تعلیمی سرگرمیاں پہلے سے طے شدہ شیڈول کے تحت **24 اگست سے بحال ہوں گی**، جبکہ 31 اگست تک تعطیلات بڑھانے کی خبریں بے بنیاد ہیں۔
