کمپٹیشن اپیلیٹ ٹربیونل نے کمپٹیشن کمیشن آف پاکستان کے 27 مئی 2025 کے فیصلے کو برقرار رکھتے ہوئے کنگڈم ویلی (پرائیویٹ) لمیٹڈ کو ہدایت جاری کی ہے کہ وہ اپنے ہاؤسنگ منصوبے کے مقام اور اس کی منظوری کی حیثیت کے بارے میں صارفین کو گمراہ کرنے پر 3 کروڑ 50 لاکھ روپے جرمانہ ادا کرے۔
عوام کیلئے خوشخبری: ٹریفک جرمانوں میں کمی کا بل ایوان سے منظور
کارروائی کے دوران کمیشن نے یہ مؤقف اختیار کیا کہ کنگڈم ویلی نے دانستہ طور پر گمراہ کن تشہیری مہم چلائی، جس میں اپنے منصوبے کو، جو حقیقت میں ضلع راولپنڈی میں واقع ہے، بل بورڈز، سوشل میڈیا اور دیگر ذرائع کے ذریعے اسلام آباد میں ظاہر کیا گیا تاکہ صارفین کو زیادہ قیمت پر متوجہ کیا جا سکے۔ اس کے علاوہ، منصوبے کو باقاعدہ منظوری حاصل ہونے سے پہلے ہی اسے “این او سی منظور شدہ” کے طور پر پیش کیا گیا، جو ایک منظم دھوکہ دہی کی حکمت عملی کی عکاسی کرتا ہے۔
اپنے تفصیلی فیصلے میں ٹربیونل نے کمیشن کے مؤقف کی توثیق کرتے ہوئے کہا کہ کمپنی نے منصوبے کو “کنگڈم ویلی اسلام آباد” کے نام سے پیش کر کے واضح طور پر غلط بیانی کی، حالانکہ اس کا اصل مقام راولپنڈی ہے۔ ٹربیونل نے اس بات کی بھی نشاندہی کی کہ اشتہارات منظوری حاصل ہونے سے پہلے ہی جاری کر دیے گئے تھے، جس سے دھوکہ دہی کا عنصر مزید نمایاں ہو جاتا ہے۔
ٹربیونل نے کنگڈم ویلی کے اس مؤقف کو بھی مسترد کر دیا کہ اس شعبے میں ایسے طریقے عام ہیں، اور کہا کہ “جب خلاف ورزی کھلے عام ہو تو دھوکہ دہی کا پہلو ناقابل انکار ہو جاتا ہے”، مزید یہ کہ “دو غلطیاں کبھی ایک درست عمل نہیں بن سکتیں”۔
کمپٹیشن ایکٹ کے سیکشن 10(2)(ب) کے تحت خلاف ورزی کو برقرار رکھتے ہوئے، جو صارفین کو گمراہ کن معلومات فراہم کرنے سے متعلق ہے، ٹربیونل نے 3 کروڑ 50 لاکھ روپے جرمانہ برقرار رکھا اور منصوبے کے مقام کی غلط بیانی کو ایک “سنگین خلاف ورزی” قرار دیا۔ ٹربیونل نے اس بات پر زور دیا کہ اس نوعیت کے اقدامات، خصوصاً رئیل اسٹیٹ کے شعبے میں، انتہائی نقصان دہ ثابت ہوتے ہیں جہاں صارفین کو مبالغہ آمیز دعوؤں کے ذریعے گمراہ کیا جاتا ہے، جس کے نتیجے میں انہیں مالی نقصان اٹھانا پڑتا ہے۔
ٹربیونل نے مزید ہدایت کی کہ اگر مقررہ 20 دن کے اندر جرمانہ ادا نہ کیا گیا تو کمیشن کا اصل فیصلہ مکمل طور پر بحال ہو جائے گا، جس کے باعث کمپنی کو مزید مالی ذمہ داری کا سامنا کرنا پڑ سکتا ہے۔
یہ فیصلہ گمراہ کن تشہیر کے خلاف سی سی پی کے سخت مؤقف کو مزید مضبوط بناتا ہے، خاص طور پر رئیل اسٹیٹ کے شعبے میں جہاں صارفین کی شکایات اور غلط تشہیر کے رجحان میں اضافہ دیکھا جا رہا ہے۔
