وزیراعظم آزاد کشمیر کا میڈیا کے مسائل حل کرنے کے لیے ٹاسک فورس بنانے کا اعلان

مظفرآباد:وزیراعظم آزاد حکومت ریاست جموں و کشمیر، چوہدری انوارالحق نے اخباری مالکان کے ساتھ مکالمے کا آغاز کر دیا۔ پہلے مرحلے میں، صدر اے کے این ایس امجد چوہدری کی قیادت میں اے کے این ایس مظفرآباد کے وفد نے وزیراعظم ہاؤس میں ملاقات کی۔ اس ملاقات میں موسٹ سینئر وزیر کرنل ریٹائرڈ وقار احمد نور، وزراء حکومت پیر مظہر سعید شاہ، میاں عبدالوحید، سردار عامر الطاف خان، محترمہ تقدیس گیلانی، سیکرٹری اطلاعات عدنان خورشید اور اے کے این ایس کے ممبران بھی شریک ہوئے۔

وفد سے گفتگو کرتے ہوئے وزیراعظم آزاد کشمیر، چوہدری انوارالحق نے کہا کہ موجودہ دور ڈیجیٹل اور سوشل میڈیا کا دور ہے اور معاشرتی بہتری کے لیے میڈیا کا کردار انتہائی اہمیت کا حامل ہے۔ انہوں نے یقین دلایا کہ ریاستی اخبارات کے تمام مسائل ترجیحی بنیادوں پر حل کیے جائیں گے۔ وزیراعظم نے مزید کہا کہ اے کے این ایس اور وزارت اطلاعات مشترکہ طور پر ایک ٹاسک فورس بنائیں گے، جو میڈیا پالیسی سمیت تمام مسائل کو دیکھے گی۔

چوہدری انوارالحق نے کہا کہ حکومت انوسٹیگیشن رپورٹنگ کی حوصلہ افزائی کرے گی اور سچ لکھنے والے صحافیوں کو بھرپور سپورٹ فراہم کی جائے گی۔ انہوں نے اس بات پر زور دیا کہ قلم کی حرمت کو معاش کے ہاتھوں یرغمال بننے کی اجازت نہیں دی جا سکتی۔ یہ عوام دوست حکومت ہے، اور ریاستی اخبارات میں اشتہارات کی منصفانہ تقسیم کو یقینی بنایا جائے گا تاکہ کسی کی حق تلفی نہ ہو۔

وزیراعظم نے یہ بھی اعلان کیا کہ 7 دن کے اندر ڈسپلنری کمیٹی تشکیل دی جائے گی، جس کی ذمہ داری سیکرٹری اطلاعات کے حوالے کی جائے گی۔ ان کا کہنا تھا کہ روایتی صحافت سے ہٹ کر مثبت اور جدید صحافت کو فروغ دیا جائے گا، کیونکہ دنیا کے ٹرینڈز بدل رہے ہیں اور معاشرے میں نئی سوچ کی ضرورت ہے۔

چوہدری انوارالحق نے مزید کہا کہ میڈیا کا کردار ریاست سے نفرت، کرپشن، تعصبات اور علاقائی ازم کو ختم کرنے کے لیے اہم ہے۔ حکومت ریاست کے عوام کا معیار زندگی بہتر بنانے کے لیے تمام وسائل بروئے کار لا رہی ہے اور عوام کی فلاح و بہبود کے لیے تمام ممکنہ اقدامات کیے جائیں گے۔

وزیراعظم نے کہا کہ شہریوں کے حقوق کا تحفظ حکومت کی اولین ذمہ داری ہے اور جائز احتجاج ہر شہری کا حق ہے۔ حکومت کسی کو بھی جائز احتجاج سے نہیں روک سکتی۔ انہوں نے کہا کہ حکومت پر عوام کا اعتماد بحال کرنا ہے اور اس میں میڈیا کا کردار اہم ہے۔ مثبت صحافت کو فروغ دینے سے معاشرے میں مثبت تبدیلی آ سکتی ہے۔

وزیراعظم نے اس عزم کا اظہار کیا کہ جائنٹ ٹاسک فورس کے ذریعے ریاستی میڈیا کے مسائل کا خاتمہ ممکن ہے اور اس کے ذریعے صحافت کے مثبت پہلو کو اجاگر کیا جائے گا۔