توہوکو یونیورسٹی اور یونیورسٹی آف کیلیفورنیا، ارون کے محققین نے الزائمر کی بیماری سے متعلق ایک اہم دریافت کرتے ہوئے بتایا ہے کہ دماغ میں ڈوپامین کی کمی بھی یادداشت کی خرابی کی ایک اہم وجہ ہو سکتی ہے۔
تحقیق، جو طبی جریدے Nature Neuroscience میں شائع ہوئی، کے مطابق الزائمر پر اب تک ہونے والی بیشتر تحقیقات دماغ میں بننے والے ایمائلوئیڈ بیٹا پلیکس اور ٹاؤ ٹینگلز پر مرکوز رہی ہیں۔ تاہم ان عوامل کو ہدف بنانے والے علاج یادداشت کی بحالی میں محدود کامیابی حاصل کر سکے ہیں۔
جاپان: آن لائن فراڈ سے نمٹنے کیلئے ورچوئل پولیس افسر متعارف
محققین کے مطابق ان کی تحقیق سے معلوم ہوا ہے کہ ڈوپامین کے نظام میں خرابی بھی الزائمر کی بیماری کے مریضوں میں یادداشت کی کمزوری کا ایک اہم اور پہلے نظرانداز کیا گیا سبب ہے۔
تحقیق کے مطابق اگر دماغ میں ڈوپامین کی سرگرمی کو بحال کیا جا سکے تو یہ الزائمر سے متاثرہ افراد میں یادداشت اور دیگر ذہنی صلاحیتوں کی بہتری کے لیے ایک نئی اور امید افزا علاجی حکمت عملی ثابت ہو سکتی ہے۔
ماہرین کا کہنا ہے کہ یہ دریافت الزائمر کے علاج سے متعلق مستقبل کی تحقیق کے لیے نئی راہیں کھول سکتی ہے، تاہم اس طریقۂ علاج کی مؤثریت ثابت کرنے کے لیے مزید تحقیق اور کلینیکل آزمائشوں کی ضرورت ہوگی۔
