نیند ہماری زندگی کے لیے نہایت اہم ہے کیونکہ اس کا براہِ راست اثر جسمانی اور ذہنی صحت پر پڑتا ہے۔
طبی ماہرین بالغ افراد کو ہر رات کم از کم سات گھنٹے نیند لینے کا مشورہ دیتے ہیں، تاہم بہت سے لوگ اتنی نیند پوری نہیں کر پاتے، جس کے نتیجے میں صحت پر منفی اثرات مرتب ہونے لگتے ہیں۔
یہ بھی حقیقت ہے کہ ہر فرد کے لیے نیند کی ضرورت اور اس کے اثرات مختلف ہو سکتے ہیں، تاہم چند عام علامات ایسی ہیں جو بتاتی ہیں کہ آپ نیند کی کمی کا شکار ہیں۔
امریکا کی ہارورڈ یونیورسٹی کے ماہرین کے مطابق نیند کی کمی کی دس اہم علامات درج ذیل ہیں:
اگر آپ کو بستر پر لیٹنے کے بعد سونے میں تیس منٹ یا اس سے زیادہ وقت لگتا ہے تو یہ ناکافی نیند کی علامت ہو سکتی ہے۔
خواب یاد نہ رہنا بھی نیند کی کمی کی ایک نشانی سمجھی جاتی ہے۔
صبح جاگنے کے بعد بھی تھکاوٹ اور تازگی نہ محسوس ہونا اس بات کی طرف اشارہ کرتا ہے کہ آپ کی نیند مکمل نہیں ہوئی۔
اسلام آباد میں پہلا ورلڈ کلاس وائلڈ لائف سفاری پارک بنانے کا فیصلہ
اگر آپ کو معمول سے زیادہ بھوک لگتی ہے، خاص طور پر جنک فوڈ کھانے کی خواہش بڑھ جاتی ہے، تو یہ بھی نیند کی کمی کی علامت ہو سکتی ہے۔
اگر آپ کی آنکھ مقررہ وقت سے پہلے کھل جاتی ہے اور دوبارہ نیند نہیں آتی تو یہ بھی ناکافی نیند کا اشارہ ہے۔
رات کے دوران ایک یا ایک سے زیادہ مرتبہ جاگ جانا بھی اس بات کی نشاندہی کرتا ہے کہ آپ کی نیند کا معیار متاثر ہو رہا ہے۔
دن کے وقت غنودگی، سستی اور مسلسل تھکاوٹ محسوس ہونا بھی نیند کی کمی کی اہم علامت ہے۔
رات کو بستر پر لیٹنے کے بعد مختلف پریشانیوں اور فکروں میں مبتلا رہنا اور دیر تک جاگتے رہنا بھی نیند کے مسائل کی نشاندہی کرتا ہے۔
آنکھوں کا سوج جانا، سرخ ہونا یا آنکھوں کے گرد سیاہ حلقوں کا نمایاں ہونا بھی نیند کی کمی سے منسلک ہو سکتا ہے۔
اگر آپ اکثر غصے، بے چینی، اداسی یا دیگر شدید جذباتی کیفیتوں کا شکار رہتے ہیں تو یہ بھی ناکافی نیند کی ایک اہم نشانی ہو سکتی ہے۔
ماہرین کے مطابق اگر ان میں سے متعدد علامات مسلسل ظاہر ہوں تو نیند کے معمولات پر توجہ دینا ضروری ہے اور ضرورت پڑنے پر کسی ماہر معالج سے مشورہ کرنا چاہیے۔
نوٹ: یہ معلومات طبی تحقیقات اور ماہرین کی آراء پر مبنی ہیں اور کسی بھی طبی مسئلے کی صورت میں اپنے معالج سے ضرور مشورہ کریں۔
