بھارتی فلم انڈسٹری کے مقبول اور عالمی شہرت یافتہ گلوکار اریجیت سنگھ نے فلمی پلے بیک سنگنگ سے ریٹائرمنٹ کا اعلان کر کے مداحوں اور شوبز کی دنیا میں حیرت پیدا کر دی ہے۔
اکاؤنٹ میں 2 ارب سے زائد منتقلی اسکینڈل، ڈی جی افسران کی پراپرٹیز تفصیلات طلب
بھارتی میڈیا رپورٹس کے مطابق اریجیت نے اپنے ذاتی ٹوئٹر اکاؤنٹ پر مداحوں کے ساتھ پلے بیک سنگنگ سے ریٹائرمنٹ کے پیچھے کئی وجوہات بھی شیئر کی ہیں۔ مداحوں کی جانب سے شیئر کی گئی پوسٹس کے مطابق اڑتیس سالہ گلوکار نے وضاحت کی کہ یہ فیصلہ نہ تو اچانک کیا گیا اور نہ ہی کسی ایک واقعے کے اثر میں آ کر؛ اس کے پیچھے متعدد وجوہات ہیں اور وہ کافی عرصے سے اس پر غور و فکر کر رہے تھے۔ بالآخر انہوں نے اس قدم کو اٹھانے کی ہمت جمع کی۔
اریجیت سنگھ نے اپنی تخلیقی بے چینی کا بھی ذکر کیا اور بتایا کہ ایک وجہ یہ ہے کہ وہ جلدی بور ہو جاتے ہیں، اسی لیے وہ ایک ہی گانے کو اسٹیج پر مختلف انداز میں پرفارم کرتے ہیں تاکہ خود کو تخلیقی طور پر مصروف رکھ سکیں۔ گلوکار نے اعتراف کیا کہ حقیقت یہ ہے کہ وہ پلے بیک سنگنگ کے موجودہ انداز سے بور ہو چکے ہیں۔
مزید برآں، بھارتی میڈیا کے مطابق اریجیت نے اس بات پر زور دیا کہ وہ موسیقی کی انڈسٹری میں نئے ٹیلنٹ کے لیے جگہ بنانا چاہتے ہیں تاکہ نوجوان اور ابھرتے ہوئے گلوکار اپنی صلاحیتوں کو سامنے لا سکیں۔ اریجیت سنگھ نے مداحوں کو یقین دہانی کروائی کہ موسیقی ان کی زندگی کا لازمی حصہ رہے گی، وہ مکمل طور پر موسیقی سے کنارہ کش نہیں ہو رہے بلکہ آئندہ اپنی موسیقی خود تخلیق کریں گے اور اسے اپنی شرائط اور انداز میں پیش کریں گے۔
اریجیت سنگھ کے اس فیصلے پر شوبز انڈسٹری کی جانب سے بھی مثبت ردعمل سامنے آیا اور کئی معروف شخصیات نے ان کے فیصلے کو سراہا ہے۔ تاہم، مداحوں کی بڑی تعداد اس خبر پر افسردگی کا اظہار کر رہی ہے اور انہیں دوبارہ پلے بیک سنگنگ میں دیکھنے کے لیے بے حد بیتاب ہے۔
