ایمان، اتحاد اور نظم قائداعظم کے اصول آج بھی رہنمائی فراہم کرتے ہیں، مسلح افواج

قائداعظم محمد علی جناح کے یوم پیدائش کے موقع پر افواجِ پاکستان نے بابائے قوم کو خراجِ عقیدت پیش کیا ہے۔

پاک فوج کے شعبہ تعلقاتِ عامہ آئی ایس پی آر کے مطابق ایمان، اتحاد اور نظم کے اصول آج بھی مسلح افواج کے لیے مشعلِ راہ ہیں۔ قائداعظم محمد علی جناح کے 149 ویں یوم پیدائش پر فیلڈ مارشل سید عاصم منیر، چیف آف نیول اسٹاف ایڈمرل نوید اشرف، چیف آف ائیر اسٹاف اور تینوں مسلح افواج کی جانب سے بانی پاکستان کو زبردست خراجِ عقیدت پیش کیا گیا۔

کراچی میں نیشنل آئل ریفائنری کی لائن سے تیل چوری کی کوشش ناکام

اعلامیے میں کہا گیا ہے کہ مسلح افواج قائداعظم کے وژن کے مطابق مضبوط، خودمختار اور خوشحال پاکستان کے عزم کا اعادہ کرتی ہیں۔ آئی ایس پی آر کے مطابق مسلح افواج ملکی خودمختاری اور علاقائی سالمیت کے تحفظ کے لیے پرعزم ہیں اور قومی استحکام، امن اور ترقی میں اپنا بھرپور کردار ادا کرتی رہیں گی۔

اعلامیے میں یہ بھی کہا گیا ہے کہ مسلح افواج قائداعظم کے نظریات کی حفاظت کے لیے ثابت قدم رہنے کے عزم کا اعادہ کرتی ہیں۔ اس موقع پر افواجِ پاکستان کی جانب سے پاکستانی مسیحی برادری کو کرسمس کی دلی مبارکباد بھی پیش کی گئی اور قومی ترقی میں مسیحی برادری کی خدمات کو سراہا گیا۔