کراچی: صوبائی وزیر اطلاعات شرجیل انعام میمن نے کہا ہے کہ حکومتِ سندھ کراچی کو نہ صرف سندھ بلکہ پورے پاکستان کا سب سے جدید اور ترقی یافتہ شہر بنانے کے لیے پُرعزم ہے۔
انہوں نے کہا کہ حکومتِ سندھ کراچی کی ترقی کے لیے دن رات کام کر رہی ہے اور شہر کی ترقی حکومت کی اولین ترجیح ہے۔ شرجیل انعام میمن کے مطابق بنیادی ڈھانچے، تعلیم، صحت اور دیگر اہم شعبوں میں جامع منصوبہ بندی کے تحت اقدامات کیے جا رہے ہیں تاکہ کراچی کو ایک جدید، پائیدار اور شمولیتی شہر بنایا جا سکے۔
پیٹرولیم مصنوعات کی درآمدات میں 2 فیصد کمی ریکارڈ
ان کا کہنا تھا کہ کراچی میں سڑکوں اور ٹریفک کے انفرااسٹرکچر کی بہتری کے لیے اب تک 194 ارب روپے کی سرمایہ کاری کی جا چکی ہے، جبکہ شاہراہِ بھٹو کوریڈور، ملیر ندی پل، مختلف انڈر پاسز اور فلائی اوورز جیسے منصوبوں پر تیزی سے کام جاری ہے، جو ٹریفک کے دباؤ میں کمی اور شہریوں کی آمد و رفت کو بہتر بنانے میں مددگار ثابت ہوں گے۔
شرجیل میمن نے بتایا کہ کراچی کے اہم ترقیاتی منصوبوں پر مارچ تک کام شروع ہو جائے گا اور ان منصوبوں میں معیار کے ساتھ ساتھ وقت کی پابندی کو بھی یقینی بنایا جائے گا۔ انہوں نے کہا کہ کراچی اور دیگر بڑے شہروں میں 9 ڈسٹرکٹ ہیڈکوارٹر اسپتالوں کی توسیع اور نئے میڈیکل کالجز کے قیام کے لیے 300 ارب روپے مختص کیے گئے ہیں، جبکہ ریڈ، ییلو اور اورنج لائن سمیت بی آر ٹی منصوبوں کے لیے 155.34 ارب روپے رکھے گئے ہیں۔
ان کا کہنا تھا کہ حکومت چاہتی ہے کہ شہری ہر شعبے میں ترقی کے عملی اثرات محسوس کریں اور ہر منصوبہ شہریوں کی زندگی میں سہولت، بہتری اور خوشحالی لانے کے لیے بنایا جا رہا ہے۔ انہوں نے مزید کہا کہ کراچی کے لیے جامع حکمتِ عملی میں پائیدار انفرااسٹرکچر، معیاری تعلیم، بہتر صحت کی سہولیات، جدید ماس ٹرانزٹ نظام، صاف پانی کی فراہمی اور محفوظ رہائش کو مرکزی حیثیت حاصل ہے۔
