پیرس کے تاریخی ہوٹل ڈروؤ میں عالمی شہرت یافتہ مصور پابلو پکاسو کی نایاب پینٹنگ **”بَسٹ آف اے وومن وِد اے فلیورڈ ہیٹ”** تقریباً 37 ملین امریکی ڈالر میں فروخت ہو کر فرانس کی سال کی سب سے بڑی آرٹ نیلامی بن گئی۔
بلوچستان: آسمان پر رنگ برنگ روشنیاں ، ہائیپر میزائل کا تجربہ یا کچھ اور
یہ فن پارہ 1943 میں تخلیق کیا گیا تھا، جب دوسری عالمی جنگ کے دوران پیرس جرمن قبضے میں تھا۔ اس میں پکاسو کی محبوبہ اور میوز ڈورا مار کو دکھایا گیا ہے، جو خود بھی ایک معروف فوٹوگرافر، شاعرہ اور مصورہ تھیں۔
یہ پینٹنگ تقریباً 80 سال تک ایک فرانسیسی خاندان کی ملکیت میں رہی اور کبھی عوام کے سامنے پیش نہیں کی گئی۔ اسے 1944 میں خریدا گیا تھا اور بعد میں نسل در نسل منتقل ہوتی رہی۔ ماہرین نے نیلامی سے قبل اس کی ابتدائی قیمت 8 ملین یورو لگائی تھی، مگر دنیا بھر سے 18 بولی دہندگان کے درمیان 35 منٹ تک جاری سخت مقابلے کے نتیجے میں یہ رقم کئی گنا بڑھ گئی۔
ماہرین کے مطابق یہ شاہکار پکاسو کے مشہور سلسلے “ویمن وِد ہیٹس” کا حصہ ہے۔ پینٹنگ میں ڈورا مار کے چہرے پر اداسی اور وقار کی ملی جلی کیفیت نمایاں ہے، جبکہ رنگوں کی تازگی آج بھی برقرار ہے کیونکہ اسے کبھی ری اسٹور یا وارنش نہیں کیا گیا۔
پکاسو اور ڈورا مار کے تعلقات 1936 سے 1945 تک جاری رہے۔ ڈورا مار نے پکاسو کے مشہور شاہکار *گرنیکا* کی تخلیق کے لمحات کو کیمرے میں محفوظ کیا تھا۔ ان دونوں کا تعلق تخلیقی طور پر زرخیز مگر ذاتی طور پر پیچیدہ سمجھا جاتا ہے۔
فنِ مصوری کے ماہرین کے مطابق یہ نیلامی نہ صرف پکاسو کے فن پاروں کی عالمی قدر کو اجاگر کرتی ہے بلکہ پیرس کی آرٹ مارکیٹ کی بین الاقوامی حیثیت کی بحالی کی بھی علامت ہے، جو حالیہ برسوں میں لندن اور نیویارک کے زیرِ اثر چلی گئی تھی۔
