شاہ محمود پارٹی کو لیڈ کرنے نہیں جارہے، پارٹی لیڈر عمران خان ہی ہیں: سلمان اکرم راجہ

**راولپنڈی:** پاکستان تحریک انصاف کے سیکریٹری جنرل سلمان اکرم راجہ نے شاہ محمود قریشی کو پارٹی کی قیادت سونپے جانے کی خبروں کو مسترد کر دیا۔

اڈیالہ جیل کے باہر میڈیا سے گفتگو کرتے ہوئے سلمان اکرم راجہ نے کہا کہ آج توشہ خانہ ٹو کیس کی سماعت ہونی ہے، ہم صبح 10 بجے سے جیل کے باہر موجود ہیں لیکن ابھی تک اندر جانے کی اجازت نہیں ملی۔

انہوں نے کہا کہ اسلام آباد ہائیکورٹ کے واضح احکامات موجود ہیں کہ فیملی اور وکلا کو سماعت میں شریک ہونے دیا جائے، آئین کا تقاضا ہے کہ ٹرائل اوپن ہو، لیکن یہاں وکلا کو باہر بٹھا کر اندر بند کمرے میں ٹرائل کیا جا رہا ہے، جو آئین کی صریح خلاف ورزی ہے۔

سلمان اکرم راجہ نے کہا کہ بند کمرے میں ہونے والا ٹرائل غیر آئینی اور غیر قانونی ہے، اسے کالعدم قرار دیا جانا چاہیے۔ شاہ محمود قریشی کے خلاف اس وقت 8 سے 9 مقدمات زیر سماعت ہیں اور وہ مزید 8 مقدمات میں گرفتار بھی ہیں۔

انہوں نے واضح کیا کہ پارٹی کی قیادت عمران خان کے پاس ہی ہے، شاہ محمود قریشی پارٹی کو لیڈ نہیں کر رہے، یہ باتیں صرف افواہیں اور مفروضات ہیں، البتہ شاہ محمود قریشی اپنی موجودہ پارٹی پوزیشن پر برقرار ہیں۔