ملک کے دو بڑے ایئرپورٹس، لاہور اور فیصل آباد، پر فضائی حادثات کا خطرہ اس وقت بڑھ گیا جب پرندوں کے جہازوں سے ٹکرانے کے دو الگ الگ واقعات پیش آئے۔ خوش قسمتی سے دونوں واقعات میں تمام مسافر محفوظ رہے۔
ایئرپورٹ ذرائع کے مطابق لاہور ایئرپورٹ پر نجی ایئرلائن کی کراچی جانے والی پرواز جب رن وے پر ٹیک آف کی تیاری کر رہی تھی، ایک پرندہ اچانک طیارے سے آ ٹکرایا۔ واقعے کے فوراً بعد جہاز کو واپس پارکنگ ایریا میں منتقل کر دیا گیا، جہاں انجینئرز نے تفصیلی معائنہ شروع کر دیا۔ پائلٹ نے ابتدائی رپورٹ میں بتایا کہ پرندہ سامنے سے آ کر طیارے سے ٹکرایا تھا۔
فیصل آباد ایئرپورٹ پر دبئی سے آنے والی پرواز کے انجن میں پرندہ ٹکرا گیا، جس کے نتیجے میں انجن میں تکنیکی خرابی پیدا ہوئی۔ پائلٹ نے مہارت سے طیارے کو بحفاظت لینڈ کرایا اور تمام مسافروں کو بخیریت ایئرپورٹ پہنچا دیا گیا۔ واقعے کے بعد پرواز کو تاخیر کا سامنا کرنا پڑا۔
حکومت پنجاب کی جانب سے فضائی حادثات کی روک تھام کے لیے فوری اقدامات اٹھائے گئے ہیں۔ وزیراعلیٰ پنجاب مریم نواز کی ہدایت پر "نو برڈ زون” کی حدود میں کارروائیاں تیز کر دی گئی ہیں۔ لاہور ایئرپورٹ کے اطراف 8 کلومیٹر کے دائرے میں وائلڈ لائف، ای پی اے، ضلعی انتظامیہ اور دیگر ادارے مشترکہ آپریشنز کر رہے ہیں۔
ان کارروائیوں کے دوران کچرا ہٹانے، پولٹری شاپس کی نگرانی، اور پرندوں کے گھونسلے اور ڈبے ختم کرنے جیسے اقدامات کیے جا رہے ہیں۔ اب تک شالامار باغ، بھٹہ چوک، آر اے بازار، گیریژن گالف کلب، الفیصل ٹاؤن، جیل روڈ، اور بہار شاہ روڈ سمیت متعدد علاقوں سے سینکڑوں گھونسلے ہٹا دیے گئے ہیں، جبکہ درجنوں شہریوں کو جرمانے اور گرفتار بھی کیا گیا ہے۔
وزیراعلیٰ مریم نواز نے ان کارروائیوں میں رضا کارانہ تعاون پر شہریوں کا شکریہ ادا کرتے ہوئے کہا کہ فضائی سفر کو محفوظ بنانا حکومت کی اولین ترجیح ہے، اور متعلقہ ادارے اس مقصد کے لیے ہر ممکن اقدامات جاری رکھیں گے۔
