کیا آپ وزن کم کرنے کےلیے انٹرمٹنٹ فاسٹنگ کررہے ہیں؟ یہ اہم باتیں ضرور جان لیں

وزن کم کرنے کے لیے انٹرمٹنٹ فاسٹنگ کا رجحان بڑھ رہا ہے، تاہم ماہرین کے مطابق صرف کھانے کے اوقات محدود کرنا کافی نہیں بلکہ متوازن غذا، مناسب پانی اور صحت مند طرزِ زندگی بھی ضروری ہے۔ اس طریقے میں مخصوص اوقات میں کھانا اور باقی وقت وقفہ رکھا جاتا ہے، لیکن مجموعی غذائی ضروریات کو نظر انداز نہیں کرنا چاہیے۔ خوراک میں مناسب مقدار میں صحت مند چکنائیاں، پھل، سبزیاں اور پروٹین شامل کرنا بہتر ہے، جبکہ جنک فوڈ اور بے وقت اسنیکس سے پرہیز کیا جائے۔ ہفتہ وار کھانے کی منصوبہ بندی اور گھر میں کھانا تیار کرنے سے غذائی اجزا اور مقدار کو بہتر انداز میں کنٹرول کیا جاسکتا ہے۔ ماہرین جسمانی سرگرمی کے ساتھ دن بھر مناسب مقدار میں پانی پینے پر بھی زور دیتے ہیں۔ فاسٹنگ کے دوران بعض افراد بلیک کافی یا ہربل چائے استعمال کرتے ہیں، تاہم فرد کی صحت اور ان مشروبات میں شامل اجزا کو مدنظر رکھنا ضروری ہے۔ ماہرین کے مطابق انٹرمٹنٹ فاسٹنگ ہر شخص کے لیے یکساں طور پر موزوں نہیں، اس لیے ذیابیطس، حمل یا کسی دوسری طبی حالت میں مبتلا افراد کو اس طریقے کو اپنانے سے پہلے ڈاکٹر یا مستند غذائی ماہر سے مشورہ کرنا چاہیے۔