قومی اسمبلی میں پاکستان کا پہلا اے آئی فعال پارلیمانی نظام باضابطہ طور پر شروع کر دیا گیا ہے۔ اسپیکر قومی اسمبلی سردار ایاز صادق نے اس اقدام کو جدید اور ڈیجیٹل پارلیمان کی جانب ایک اہم پیش رفت قرار دیا۔
مونی رائے سے علیحدگی کی وجہ کوئی تیسرا؟ سوراج نے خاموشی توڑ دی
اسلام آباد میں تقریب سے خطاب کرتے ہوئے انہوں نے کہا کہ جدید ٹیکنالوجی وقت کی اہم ضرورت ہے اور اس کے استعمال سے ادارہ جاتی کارکردگی میں واضح بہتری آ رہی ہے۔ ان کے مطابق پہلے فائلوں کے نظام کی وجہ سے کام میں تاخیر ہوتی تھی، لیکن اب ڈیجیٹل نظام سے شفافیت اور رفتار دونوں میں اضافہ ہوا ہے۔
اسپیکر نے بتایا کہ قومی اسمبلی کو مرحلہ وار پیپر لیس بنایا جا رہا ہے اور بجٹ دستاویزات کو بھی ڈیجیٹل نظام پر منتقل کیا جا رہا ہے۔ انہوں نے کہا کہ اراکین پارلیمنٹ ایوان کی کارروائی میں جدید ٹیکنالوجی کے استعمال میں گہری دلچسپی رکھتے ہیں۔
انہوں نے وزارت آئی ٹی اور این آئی ٹی بی کے تعاون کو سراہتے ہوئے کہا کہ پارلیمانی امور میں اے آئی کے استعمال سے قانون سازی اور انتظامی معاملات میں مزید بہتری آئے گی۔ اس مقصد کے لیے قومی اسمبلی میں جدید ڈیٹا سینٹر کے قیام پر بھی کام جاری ہے۔
مزید یہ کہ قومی اسمبلی کے آئی ٹی ڈائریکٹوریٹ کے عملے کی تربیت کے لیے بھی اقدامات کیے جا رہے ہیں تاکہ ڈیجیٹل اور اے آئی نظام کو مؤثر طریقے سے چلایا جا سکے۔
اس اقدام کو پاکستان میں پارلیمانی نظام کی ڈیجیٹل تبدیلی کی طرف ایک اہم قدم قرار دیا جا رہا ہے۔
