عالمی ادارہ صحت (WHO) نے خبردار کیا ہے کہ فنڈز کی شدید کمی کے باعث دنیا بھر میں پولیو کے خاتمے کی کوششیں خطرے میں پڑ سکتی ہیں۔
رپورٹ کے مطابق پولیو کے خلاف عالمی مہم *گلوبل پولیو ایریڈیکیشن انیشی ایٹو* کو ایک ارب 70 کروڑ ڈالر کے مالی خسارے کا سامنا ہے۔
خیبرپختونخوا کابینہ میں غیرمنتخب افراد کی شمولیت پر ارکان اسمبلی نے احتجاج کی دھمکی
ورلڈ ہیلتھ آرگنائزیشن کے ڈائریکٹر برائے پولیو خاتمہ جمال احمد نے کہا کہ فنڈز میں نمایاں کمی کے باعث بعض اہم سرگرمیاں انجام نہیں دی جا سکیں گی۔
ماہرین کے مطابق اس مالی بحران کی بنیادی وجہ بین الاقوامی امداد میں کمی ہے، خاص طور پر امریکہ، برطانیہ اور جرمنی کی جانب سے عطیات میں نمایاں کمی دیکھی گئی ہے۔
رپورٹ میں بتایا گیا ہے کہ فنڈز کی کمی کے باعث پولیو کے خطرناک علاقوں میں ویکسینیشن اور نگرانی پر توجہ مرکوز رکھی جائے گی، جبکہ کم خطرے والے علاقوں میں مہم محدود یا عارضی طور پر معطل کی جا سکتی ہے۔
عالمی ادارہ صحت نے خبردار کیا ہے کہ اگر مالی امداد میں فوری اضافہ نہ کیا گیا تو گزشتہ کئی دہائیوں کی محنت ضائع ہونے کا خدشہ ہے۔
واضح رہے کہ پولیو کے خاتمے کی عالمی مہم 1988 میں شروع ہوئی تھی جس کے بعد کیسز میں نمایاں کمی آئی، تاہم وائرس اب بھی افغانستان اور پاکستان میں موجود ہے۔ سال 2025 کے دوران ان دونوں ممالک سے جنگلی پولیو کے 36 کیسز رپورٹ ہوئے، جبکہ ویکسین سے پیدا ہونے والے پولیو کے 149 کیسز مختلف ممالک میں سامنے آئے ہیں۔
