اسلام آباد میں رفاہ انٹرنیشنل یونیورسٹی اور اقتصادی تعاون تنظیم (ECO) کے درمیان ثقافتی و علمی شعبوں میں تعاون کے فروغ کے حوالے سے اہم پیش رفت ہوئی ہے۔ ای سی او کے کلچرل ونگ کے صدر سفیر محمد حسن نے پاکستان کے دورے کے دوران رفاہ انٹرنیشنل یونیورسٹی کے چانسلر حسن محمد خان سے ملاقات کی۔
ملاقات میں دونوں اداروں کے درمیان باہمی تعاون کو مزید مستحکم بنانے، خصوصاً آئندہ میڈیا لٹریسی اینڈ کلچرل سیمینار کے انعقاد کے حوالے سے تبادلہ خیال کیا گیا۔ اس موقع پر ای سی او کے رکن ممالک کے درمیان علمی، ثقافتی اور عوامی سطح پر روابط کو فروغ دینے کے امکانات بھی زیر غور آئے۔
چانسلر حسن محمد خان نے پاکستان میں اس اقدام کے انعقاد کے لیے سفیر محمد حسن کی کاوشوں کو سراہتے ہوئے کہا کہ رفاہ انٹرنیشنل یونیورسٹی علاقائی سطح پر بامعنی روابط اور دیرپا تعاون کے فروغ میں اپنا کردار جاری رکھے گی۔ ملاقات کے اختتام پر انہوں نے سفیر محمد حسن کو یادگاری شیلڈ بھی پیش کی۔
ملاقات میں یونیورسٹی کے مختلف عہدیداران بھی شریک ہوئے۔ شرکاء نے اس اشتراک کو اداروں کو باہم جوڑنے، ثقافتی روابط مضبوط بنانے اور خطے میں مشترکہ علمی و ثقافتی تعاون کے فروغ کی جانب اہم قدم قرار دیا۔
