Gas Leakage Web ad 1

پاکستان پولٹری کی صنعت توجہ طلب

0

زراعت، لائیوسٹاک اور پولٹری انڈسٹری ملکی معیشت کی ترقی میں اہم کردار ادا کر سکتی ہیں

Gas Leakage Web ad 2

پاکستان کی معیشت میں زراعت اور لائیوسٹاک کو بنیادی اہمیت حاصل ہے، لیکن بدقسمتی سے ماضی میں ان دونوں شعبوں پر مطلوبہ توجہ نہیں دی گئی، جس کے باعث کسانوں کی معاشی حالت بہتر نہ ہو سکی اور لائیوسٹاک کا شعبہ بھی اپنی مکمل صلاحیت کے مطابق ترقی نہیں کر پایا۔ اگر زراعت، لائیوسٹاک اور سیاحت کو حکومتی ترجیحات میں شامل کیا جائے تو یہ شعبے ملکی معیشت کو مضبوط بنانے، روزگار کے مواقع پیدا کرنے اور زرمبادلہ کے حصول میں اہم کردار ادا کر سکتے ہیں۔

پاکستان قدرتی حسن، تاریخی مقامات اور سیاحتی امکانات سے مالا مال ملک ہے۔ گلگت بلتستان، ہنزہ، کے ٹو اور دیگر شمالی علاقہ جات کو جدید سہولیات، بہتر انفراسٹرکچر اور مؤثر تشہیر کے ذریعے باقاعدہ سیاحتی صنعت میں تبدیل کیا جا سکتا ہے۔ دنیا کے متعدد ممالک سیاحت کے ذریعے خطیر زرمبادلہ حاصل کر رہے ہیں، جبکہ پاکستان بھی اس شعبے میں نمایاں امکانات رکھتا ہے۔

دوسری جانب پولٹری انڈسٹری بھی تیزی سے کاروباری شعبے کی شکل اختیار کر چکی ہے۔ دیہی علاقوں میں چھوٹے زمیندار اپنی زرعی زمینوں پر پولٹری فارمز قائم کرکے روزگار کے مواقع پیدا کر رہے ہیں۔ اس کاروبار سے نہ صرف ہزاروں خاندانوں کا روزگار وابستہ ہے بلکہ فیڈ، ادویات، ویکسین، مشینری، انڈوں کی پیداوار اور گوشت کی فراہمی جیسے کئی ذیلی کاروبار بھی ترقی کر رہے ہیں۔

پولٹری انڈسٹری کی اہمیت اور عوامی آگاہی کے لیے پاکستان پولٹری ایسوسی ایشن کے زیر اہتمام لاہور میں تین روزہ انٹرنیشنل پولٹری ایکسپو 2026 کا انعقاد کیا گیا۔ نمائش کا مقصد پولٹری انڈسٹری کو درپیش مسائل اجاگر کرنا، جدید ٹیکنالوجی متعارف کروانا اور صنعت سے وابستہ افراد کے درمیان کاروباری روابط کو فروغ دینا تھا۔

ایکسپو میں اسپیکر پنجاب اسمبلی محمد احمد خان سمیت مختلف حکومتی شخصیات، صنعت کاروں، سرمایہ کاروں، ماہرین تعلیم، صحافیوں اور سماجی شخصیات نے شرکت کی۔ اس موقع پر پولٹری مصنوعات کی غذائی اہمیت اور متوازن خوراک میں ان کے کردار کو اجاگر کرنے کے لیے خصوصی سیشنز بھی منعقد کیے گئے۔

انٹرایکٹو سیشن میں معروف صحافیوں، اینکرز اور دیگر شخصیات نے شرکت کی، جن میں مجیب الرحمان شامی، اجمل جامی، زوہیب بٹ، ہارون رفیق، شاعر ڈاکٹر طاہر شہیر، اداکارہ سیمی راحیل اور موٹیویشنل اسپیکر قاسم علی شاہ شامل تھے۔ شرکا نے پولٹری انڈسٹری کی ترقی، عوامی آگاہی اور اس شعبے کو درپیش چیلنجز پر اظہار خیال کیا۔

ایکسپو میں ڈی جی پنجاب فوڈ، ایگریکلچر اینڈ ڈرگ اتھارٹی ڈاکٹر طلعت نصیر پاشا، وائس چانسلر ویٹرنری یونیورسٹی لاہور پروفیسر ڈاکٹر مسعود ربانی اور دیگر ماہرین نے بھی شرکت کی۔ مقررین نے مرغی کے گوشت اور انڈوں کی غذائی اہمیت، پروٹین کی فراہمی اور صحت مند خوراک میں ان کے کردار پر روشنی ڈالی۔ اس بات پر بھی زور دیا گیا کہ صارفین تک پولٹری مصنوعات کے حوالے سے درست اور سائنسی بنیادوں پر معلومات پہنچانا ضروری ہے۔

نمائش میں ملکی اور غیر ملکی کمپنیوں نے اپنے اسٹالز لگائے، جہاں پولٹری فیڈ، فیڈ ایڈیٹیوز، ویٹرنری ادویات، ویکسینز، بریڈنگ، ہیچری ٹیکنالوجی، فارم مشینری، آٹومیشن اور بائیوسکیورٹی سے متعلق جدید مصنوعات پیش کی گئیں۔ چینی پویلین اور جدید پراسیسنگ پلانٹس کی نمائش نے بین الاقوامی کاروباری روابط اور سرمایہ کاری کے امکانات کو بھی نمایاں کیا۔

ایکسپو کے پہلے روز ویٹرنری یونیورسٹی لاہور کے اشتراک سے پولٹری سائنس کانفرنس منعقد ہوئی، جس میں سائنسدانوں، ویٹرنری ڈاکٹروں، محققین اور صنعت سے وابستہ ماہرین نے بیماریوں کے کنٹرول، جدید ٹیکنالوجی، غذائیت اور پیداواری صلاحیت میں اضافے جیسے موضوعات پر تبادلہ خیال کیا۔ وزیراعظم کے مشیر برائے صنعت و پیداوار ہارون اختر خان نے افتتاحی تقریب میں شرکت کی، جبکہ صوبائی وزیر چوہدری شافع حسین نے بھی نمائش کا دورہ کیا۔

تین روزہ نمائش کے دوسرے روز طلبہ و طالبات کے لیے کوئز مقابلوں کا اہتمام کیا گیا تاکہ نوجوان نسل میں انڈوں اور مرغی کے گوشت کی غذائی اہمیت کے حوالے سے شعور پیدا کیا جا سکے۔ ورلڈ ایگ ڈے کی مناسبت سے بھی خصوصی سرگرمی منعقد ہوئی، جس میں انڈے کو معیاری پروٹین، وٹامنز اور دیگر ضروری غذائی اجزا کا اہم ذریعہ قرار دیا گیا۔

پولٹری کے ساتھ ساتھ لائیوسٹاک کے شعبے پر بھی خصوصی توجہ دینے کی ضرورت ہے۔ دیہی علاقوں میں کسانوں کو جانوروں کی بہتر نسلوں، جدید افزائش نسل، بیماریوں سے بچاؤ اور دودھ و گوشت کی پیداوار بڑھانے کے حوالے سے مناسب رہنمائی میسر نہیں۔ اچھی نسل کی بھینسوں اور گائے کی افزائش کے لیے حکومتی سطح پر تربیت، جدید سہولیات اور آسان قرضوں کی فراہمی ضروری ہے۔

شمالی علاقہ جات سمیت ملک کے مختلف دیہی علاقوں میں لائیوسٹاک کے جدید طریقوں کو متعارف کروانے کی بھی ضرورت ہے۔ کسان اور لائیوسٹاک ایک دوسرے سے گہرا تعلق رکھتے ہیں، اس لیے زراعت، پولٹری اور لائیوسٹاک کے شعبوں کو الگ الگ دیکھنے کے بجائے ایک مربوط معاشی نظام کے طور پر ترقی دینے کی ضرورت ہے۔

یہ امر بھی قابل ذکر ہے کہ اب مختلف جامعات میں پولٹری سے متعلق ڈپلومہ اور تعلیمی پروگرام متعارف کروائے جا رہے ہیں، جو اس صنعت کے لیے تربیت یافتہ افرادی قوت تیار کرنے میں مددگار ثابت ہو سکتے ہیں۔ حکومت کو چاہیے کہ تعلیمی اداروں اور پولٹری انڈسٹری کے درمیان رابطوں کو مزید مضبوط بنائے تاکہ نوجوان جدید مہارتیں حاصل کرکے اس شعبے میں روزگار حاصل کر سکیں۔

پاکستان میں لاکھوں افراد بالواسطہ یا بلاواسطہ پولٹری اور لائیوسٹاک کے شعبوں سے وابستہ ہیں۔ دیہی علاقوں میں قائم پولٹری فارمز کو بہتر رہنمائی، ویٹرنری سہولیات، معیاری خوراک اور جدید ٹیکنالوجی کی ضرورت ہے۔ اگر چھوٹے فارمرز کو مناسب تربیت اور حکومتی معاونت فراہم کی جائے تو یہ شعبہ مزید ترقی کر سکتا ہے۔

پولٹری انڈسٹری کے لیے ایسی نمائشوں کا انعقاد وقت کی اہم ضرورت ہے، کیونکہ ان کے ذریعے عوام کو صنعت کی ترقی، مسائل اور امکانات سے آگاہی حاصل ہوتی ہے۔ مرغی کا گوشت اور انڈے عوام کو نسبتاً قابل رسائی پروٹین فراہم کرنے میں بھی اہم کردار ادا کرتے ہیں، اس لیے اس شعبے کو قومی غذائی تحفظ کی پالیسی کا حصہ بنایا جانا چاہیے۔

ضرورت اس امر کی ہے کہ حکومت صرف نمائشوں اور تقریبات تک محدود نہ رہے بلکہ کسانوں، پولٹری فارمرز اور لائیوسٹاک سے وابستہ افراد کے مسائل حل کرنے کے لیے عملی اقدامات بھی کرے۔ جدید ٹیکنالوجی، تحقیق، تربیت، آسان قرضوں اور بہتر مارکیٹنگ کے مواقع فراہم کیے جائیں تو زراعت، پولٹری اور لائیوسٹاک ملکی معیشت کے مضبوط ستون بن سکتے ہیں۔

پاکستان کی ترقی کا راستہ دیہی معیشت کو مضبوط بنانے، کسان کو خوشحال کرنے اور مقامی صنعتوں کو فروغ دینے سے ہو کر گزرتا ہے۔ اگر ان شعبوں کو مستقل حکومتی سرپرستی اور پالیسیوں میں تسلسل حاصل ہو جائے تو نہ صرف روزگار کے نئے مواقع پیدا ہوں گے بلکہ ملکی پیداوار، برآمدات اور مجموعی معاشی استحکام میں بھی بہتری آ سکتی ہے۔

sui northern 2
Leave A Reply

Your email address will not be published.