اسلام آباد ہائیکورٹ نے وفاقی دارالحکومت میں آوارہ کتوں کو زہر دینے، گولی مارنے یا تلف کرنے پر مستقل پابندی عائد کردی۔ جسٹس خادم حسین سومرو نے اسلام آباد میں آوارہ کتوں کی آبادی کنٹرول کرنے اور ان پر تشدد کے خلاف درخواست کا 24 صفحات پر مشتمل تفصیلی فیصلہ جاری کیا۔
دنیا میں منفرد مثال، پاکستان، چین دوستی وقت کی ہرآزمائش پر پوری اتری: شہباز شریف
عدالت نے اسلام آباد میں آوارہ کتوں کو زہر دینے، گولی مارنے یا تلف کرنے پر مستقل پابندی عائد کرنے اور آوارہ کتوں کی آبادی پر قابو پانے کے لیے ٹریپ، اسٹریلائز اور ویکسین اپنانے کی ہدایت کی۔ ہائیکورٹ نے وائلڈ لائف مینجمنٹ بورڈ، سی ڈی اے اور دیگر فریقین کو پالیسی پر عمل درآمد کا حکم دیتے ہوئے کہا کہ ویٹرنری ڈاکٹر ہی کتے کے باولے یا لاعلاج ہونے کی تصدیق اور طبی طریقے سے نجات دے سکتا ہے۔ اسلام آباد ہائیکورٹ نے کتوں کے کاٹنے کے واقعات اور ویکسی نیشن کا ڈیٹا بیس بنانے کا حکم دیتے ہوئے جانوروں پر ظلم کی رجسٹری قائم کرنے کا بھی حکم دیا۔ عدالت نے ترلائی میں قائم آوارہ کتوں کے آبادی کنٹرول سینٹر کے ریکارڈ اور ایس او پیز شفاف بنانے کا حکم دیتے ہوئے کہا کہ پاکستان میں آوارہ جانوروں کے انتظام کا کوئی یکساں قومی قانون موجود نہیں ہے، پاکستان میں آوارہ جانوروں سے متعلق صوبائی سطح پر بھی نظام بکھرا ہوا ہے۔ ہائیکورٹ کا کہنا ہے کہ جانوروں پر ظلم کی روک تھام کا ایکٹ 1890 پرانا ہو چکا ہے، جانوروں پر ظلم کی روک تھام کے ایکٹ میں اصلاحات اور سخت سزاؤں کی ضرورت ہے۔ اسلام آباد ہائیکورٹ نے سی ڈی اے کی گاڑی میں مردہ کتوں کی تصاویر سامنے آنے پر شدید تشویش کا اظہار کیا، اور کہا کہ فریقین کتوں کو مبینہ طور پر مارنے کی کوئی قانونی یا معقول وجہ پیش نہ کرسکے، آوارہ اور جنگلی کتے بھی جاندار اور حساس مخلوق ہیں، ان سے بےرحمانہ سلوک نہیں کیا جاسکتا، آئین میں زندگی کے حق میں ماحولیاتی توازن اور حیاتیاتی تحفظ بھی شامل ہے۔ فیصلے میں لکھا ہے کہ اسلامی تعلیمات، قرآن و سنت کی روشنی میں جانوروں پر ظلم کی سخت ممانعت ہے، اسلام میں تو جانوروں کے ساتھ رحمدلی کا حکم ہے۔ عدالت کو بتایا گیا کہ آوارہ کتوں کی نس بندی اور ویکسینیشن پر فی کتا 19 ہزار روپے لگتے ہیں۔ دوران سماعت ملائیشیا، ترکی، انڈونیشیا اور بھارت سمیت مختلف ممالک میں آوارہ کتوں کی آبادی کے انتظام کے قوانین کا تقابلی جائزہ پیش کیا گیا۔
