روس میں آسمان پر نایاب منظر، چار چاند ایک ساتھ نظر آنے کا دلکش منظر

سینٹ پیٹرزبرگ: روس میں آسمان پر چار چاند دکھائی دینے پر لوگ حیران رہ گئے اور اس منظر کی ویڈیوز سوشل میڈیا پر وائرل ہو گئیں۔

غیر ملکی خبر رساں ایجنسی کے مطابق روس کے شہر سینٹ پیٹرزبرگ میں ایک نایاب فلکیاتی مظہر دیکھا گیا، جہاں اصل چاند کے ساتھ تین مزید روشن عکس نمودار ہوئے، جس سے لگتا تھا کہ آسمان پر چار چاند موجود ہیں۔ اس حیرت انگیز منظر کی تصاویر اور ویڈیوز سوشل میڈیا پر تیزی سے شیئر کی گئیں۔

شرح سود برقرار رکھنے پر سوالات، وزیراعظم کی کمی کی ہدایت

وائرل ویڈیوز اور تصاویر میں اصل چاند کے اطراف کئی روشن گول دائروں کو واضح طور پر دیکھا جا سکتا ہے، جس نے ناظرین کو حیرت میں مبتلا کر دیا۔ روس کے سرکاری خبر رساں ادارے آر ٹی نے بھی اس غیر معمولی منظر کو اپنے سوشل میڈیا پلیٹ فارمز پر شیئر کیا۔

ماہرین فلکیات کے مطابق اس مظہر کو ’پیراسیلین‘ کہا جاتا ہے، جسے عام زبان میں ’فرضی چاند‘ یا ’مون ڈاگ‘ کہا جاتا ہے۔ یہ منظر اس وقت بنتا ہے جب سرد موسم میں چاند کی روشنی فضا میں موجود برف کے چھوٹے ذرات سے گزرتی ہے، جو روشنی کو مخصوص زاویے پر موڑ دیتے ہیں، اور چاند کے اطراف اضافی روشن دھبے ظاہر ہوتے ہیں۔

پیراسیلین عموماً اصل چاند سے تقریباً 22 ڈگری یا اس سے زیادہ فاصلے پر دکھائی دیتے ہیں اور اصل چاند کے مقابلے میں زیادہ مدھم ہوتے ہیں۔ یہ مظہر اس وقت زیادہ نمایاں ہوتا ہے جب چاند افق کے قریب ہو، کیونکہ اس دوران چاند کی روشنی نسبتاً کم ہو جاتی ہے۔

فلکیاتی ادارے ’اسکائی بریری‘ کے مطابق یہ روشن دھبے ہمیشہ افق کے اوپر چاند کی سطح پر ظاہر ہوتے ہیں، اور ان کی شکل و جسامت بادلوں میں موجود برفانی ذرات کے زاویے اور حرکت پر منحصر ہوتی ہے۔ بڑے ذرات عام طور پر لمبے اور نمایاں روشنی کے ستون بناتے ہیں، جو منظر کو مزید ڈرامائی بناتے ہیں۔

ماہرین کے مطابق اگرچہ پیراسیلین کا تعلق دن کے وقت دکھائی دینے والے ’سن ڈاگز‘ سے ہے، مگر ایک ہی وقت میں کئی فرضی چاند کا ظاہر ہونا بہت نایاب ہے۔ سینٹ پیٹرزبرگ میں یہ منظر اس لیے منفرد ہے کہ بیک وقت متعدد پیراسیلین نظر آئے اور آسمان پر چار چاند ہونے کا تاثر پیدا ہوا۔

ماہرین کا کہنا ہے کہ یہ مظہر اس بات کی یاد دہانی ہے کہ موسمی اور فضائی حالات کس طرح ایک عام رات کو غیر معمولی اور یادگار بنا سکتے ہیں، اور جن خوش نصیب لوگوں نے یہ منظر اپنی آنکھوں سے دیکھا، ان کے لیے یہ رات حیرت اور خاموش مسرت کا سبب بنی۔